Кіраўнікі «Белкард» незаконна выпісалі сабе прэміі на 610 мільёнаў
14- 4.09.2013, 16:07
- 41,490
А бухгалтэрыя прадпрыемства «забылася» даць справаздачу пра гэта.
Супрацоўнікі службы па барацьбе з эканамічнымі злачынствамі УУС Гродзенскага аблвыканкама сумесна з Камітэтам дзяржкантролю па Гродзенскай вобласці прадухілілі прычыненне шкоды ў асабліва буйным памеры ААТ «Белкард» на суму больш за Br610 млн, перадае «Інтэрфакс».
Пра гэта паведаміла старэйшы оперупаўнаважаны па асабліва важных справах ГУБЭЗ МУС Беларусі Вераніка Пасмецьева.
Паводле яе слоў, у ходзе аператыўнага суправаджэння праграмы мадэрнізацыі горадаўтваральных прадпрыемстваў Гродна, а таксама праграмы інавацыйнага развіцця міністэрства прамысловасці на 2011-2015 гады ў ліпені-жніўні 2013 года супрацоўнікамі ўпраўлення па раскрыцці цяжкіх эканамічных злачынстваў УУС Гродзенскага аблвыканкама праводзілася праверка ў дачыненні да службовых асобаў ААТ «Белкард». Падставай для праверкі стаў факт неабгрунтаванай выплаты штогадовага аднаразовага ўзнагароджання службовым асобам прадпрыемства.
Пасмецьева патлумачыла, што гэта прадпрыемства з'яўляецца адным з найбуйнейшых вытворцаў карданных перадач і валаў не толькі сярод краін СНД, але і краін Еўропы. Паводле нормаў распрацаванага акцыянерным таварыствам палажэння, калі прадпрыемства атрымала абумоўлены бізнес-планам чысты прыбытак і выканала цэлы шэраг прагнозных паказчыкаў, кіраўніцтва і топ-мэнэджэры кампаніі маюць права на атрыманне штогадовых грашовых бонусаў.
«Аператыўнікі службы БЭЗ сумесна са спецыялістамі КДК устанавілі, што прадпрыемства «Белкард» не выканала даведзенае заданне па аб'ёме інвестыцый на 2012 год», - паведаміла Вераніка Пасмецьева. Так, пры прагнозе ў Br21 млрд інвестыцый фактычна ў асноўны капітал было ўкладзена Br18, 1 млрд, у той час як у справаздачнасці фігуравала лічба ў Br21,078 млрд.
«Як высветлілася, па сваёй няўважлівасці, недакладныя звесткі аб інвестыцыях у асноўны капітал ўнесла ў дзяржаўную справаздачнасць бухгалтэрыя прадпрыемства, аднак кіраўніцтвам ААТ быў выдадзены загад аб выплаце штогадовага аднаразовага ўзнагароджання. Шэраг службовых асобаў быў незаконна прэміраваны на агульную суму звыш Br610 млн», - паведаміла прадстаўнік ГУБЭЗ.
Паводле яе слоў, у цяперашні час з мэтай кампенсацыі незаконна атрыманых грашовых сродкаў кіраўніцтвам прадпрыемства адмененыя загады аб выплаце штогадовага аднаразовага ўзнагароджання службовым асобам «Белкарда». У касу прадпрыемства кіраўніцтвам і службовымі асобамі ўжо добраахвотна ўнесена больш за Br436 млн, астатнюю суму ўтрымаюць з іх заработнай платы, сказала Вераніка Пасмецьева.
Такім чынам, у выніку праведзеных сумесных мерапрыемстваў супрацоўнікі службы БЭЗ і КДК Гродзенскай вобласці прадухілілі нанясенне шкоды ў асабліва буйным памеры ААТ «Белкард».
У цяперашні час доля дзяржавы ў статутным фондзе ААТ «Белкард» складае менш за 50%.