Расея вярнула тоны небяспечнага малака і мяса з Беларусі

Рассельгаснагляд выявіў выпадкі ўвозу беларускай малочнай прадукцыі і мяса з парушэннямі.

9 верасня, прэс-служба Рассельгаснагляду паведаміла пра тое, што ў Бранскай і Смаленскай абласцях выяўлена дзве партыі малочнай прадукцыі агульнай вагой каля 17 т і пяць партый гатовай мясной прадукцыі агульнай вагой каля 3 т, увезеных з Беларусі без ветэрынарных суправаджальных дакументаў і з парушэннем умоў транспарціроўкі, перадае ІА «Росбалт».

Акрамя таго, выяўленая партыя астуджанай ялавічыны агульнай вагой больш за 15 т, якая перавозіцца з парушэннямі ветэрынарна-санітарных патрабаванняў у частцы кляймення мяса. Небяспечная прадукцыя вернутая на тэрыторыю Беларусі.

Як нагадвае amic.ru, 30 жніўня Рассельгаснагляд прыпыніў пастаўкі свініны з Беларусі ў сувязі з рэгістрацыяй там выпадкаў афрыканскай чумы свіней .

Абмежаванні ўводзяцца з 30 жніўня да выкаранення захворвання на тэрыторыі Беларусі альбо да вызначэння заасанітарнага статусу гаспадарак, якія займаюцца развядзеннем свіней. Увоз свініны адновяць таксама ў тым выпадку, калі Еўразійская мытная камісія ўвядзе нарматыўны акт, які будзе рэгуляваць парадак вызначэння заасанітарнага статусу.

Да гэтага галоўны санітарны ўрач РФ Генадзь Анішчанка заявіў, што асцярогі выклікаюць малочныя прадукты, якія пастаўляюцца з Беларусі: з 240 узятых узораў 72 апынуліся небяспечнымі.

Некаторыя эксперты лічаць крытыку якасці імпарту з Беларусі адказам на нядаўні арышт у Менску генеральнага дырэктара «Уралкалію» Уладзіслава Баўмгертнера.