Падрабязнасці катастрофы Су-25: Штурмавік на некалькі метраў увайшоў у зямлю

Лётчык сам паведаміў пра катастрофу на базу.

Цяпер на месцы, дзе разбіўся штурмавік, працуюць эксперты. Ім трэба будзе разабрацца ў прычынах таго, што адбылося. Пакуль жа разглядаюцца ўсе магчымыя версіі. На шчасце, у гэтым здарэнні ні лётчык, ні людзі на зямлі не пацярпелі. Дасведчаны пілот змог прадухіліць трагедыю. Самалёт упаў на краі лесу. Экстранае паведамленне пра катастрофу вайсковага самалёта пад Лідай паступіла блізу поўдня. У вайсковым ведамстве паведамілі, што штурмавік 116-й авіябазы рабіў планавы палёт, паведамляе АНТ.

Падчас выканання практыкавання лётчык страціў кіраванне, але змог адвесці 20-тонную машыну ад населенага пункта і толькі пераканаўшыся ў тым, што траекторыя падзення бяспечная, катапультаваўся. Лётчык сам паведаміў пра катастрофу на базу. З паветра жа пошукава-выратавальная каманда заўважыла купал парашута, варонку ад удару і дым ад пажару. Да месца аварыі прыбылі ўсе аператыўныя службы.

Следчыя паведамілі, што разглядаюцца розныя версіі катастрофы, але рабіць нейкія высновы рана. Таму і афіцыйныя каментары пакуль можна назваць сухімі.

«Следчым камітэтам датычна гэтага факту распачатая крымінальная справа паводле артыкула 465 часткі першага Крымінальнага кодэксу - гэта парушэнне правілаў палётаў і падрыхтоўкі да іх. На месцы здарэння працуе следчая група галоўнага следчага ўпраўлення, прадстаўнікі Міністэрства абароны і Дзяржаўнага камітэта судовых экспертыз», - паведамляе начальнік галоўнага следчага ўпраўлення Следчага камітэта Алег Шандаровіч.

Перш чым адправіць абломкі крылатай машыны на экспертызу, іх яшчэ трэба будзе дастаць: удар аб зямлю быў такой сілы, што штурмавік на некалькі метраў увайшоў углыб.

Су-25, які атрымаў мянушку «Грак», - браніраваны штурмавік на ўсялякае надвор’е. Прызначаны для падтрымкі сухапутных войскаў на полі бою. Дадзены тып самалётаў знаходзіцца на ўзбраенні ў многіх краін і зарэкамендаваў сваю надзейнасць і ўдарную моц у мностве вайсковых канфліктаў.

Вядома, што палёт Су-25 быў планавым. За штурвалам знаходзіўся дасведчаны пілот. На момант аварыі самалёт быў за 20 кіламетрах ад авіябазы і за 30 - ад палігона. Цяпер на месцы катастрофы працягваюцца працы.