Славакія заявіла аб скарачэнні паставак расейскага газу на 50 адсоткаў

Славацкі імпарцёр газу SPP зарэгістраваў падзенне аб'ёмаў пастаўляемага расейскага газу на 50 адсоткаў.

Пра гэта заявіў прэм'ер-міністр Славакіі Робэрт Фіцо, піша РІА Новости.

Прэм'ер таксама дадаў, што ў выпадку, калі гэтая тэндэнцыя прадоўжыцца надалей, ён будзе вымушаны склікаць экстраную нараду кабінета міністраў наконт гэтага пытання. Адначасова ён паведаміў, што ў выпадку патрэбы Славакія можа атрымліваць газ у рэверсным рэжыме з Чэхіі ды Аўстрыі.

Пры гэтым, падкрэсліў кіраўнік урада, славацкі атрымальнік і дыстрыб'ютар расейскага газу кампанія Slovensky plynarensky priemysel будзе далей забяспечваць бесперабойную пастаўку газу «ўсім сваім кліентам».

Раней міністр прамысловасці рэспублікі Павал Паўліс падчас тэлевыступу заявіў, што Славакія можа пратрымацца без паставак расейскага газу праз Украіну паўгода. Са слоў міністра, славацкая старана атрымала тлумачэнні ад «Газпрома», што невыкананне заявак на пастаўку газу носіць тэхнічны характар.

Кіраўнік «Газпрома» Аляксей Мілер тлумачыў раней, што заявы еўрапейскіх спажыўцоў пра недапастаўкі газу тычацца толькі дадатковых аб'ёмаў, а кантрактныя абавязанні «Газпром» цалкам выконвае. Заяўкі спажыўцоў звыш кантрактных аб'ёмаў «Газпром» задавальняць не абавязаны. Мілер дадаў, што кампанія напярэдадні халоднай зімы актыўна запампоўвае газ у расейскія ПСГ. Пасля запаўнення расейскіх сховішчаў «Газпром» зможа задаволіць і дадатковы попыт еўрапейскіх спажыўцоў, запэўніў ён.

15 верасня стала вядома, што аператар славацкай газатранспартнай сістэмы (ГТС) Eustream з 12 верасня пачаў скарачаць транзіт газу праз краіну. Калі месяц таму праз кампрэсарную станцыю Вельке Капушаны праходзіла звыш 70 мільёнаў кубаметраў у дзень, то на 15 верасня аб'ёмы склалі 49,6 мільёна кубаметраў.

Раней Славакія называлася ў ліку краін, якія пастаўлялі газ ва Украіну паводле рэверснай схемы. З пачатку верасня Украіна імпартавала праз рэверс са Славакіі 380,9 мільёна кубаметраў газу.