Сепаратысты абяцаюць выконваць перамір'е ў Данбасе праз 5 дзён

«Прэм'ер-міністр» ДНР абвясціў аб увядзенні ў Данбасе «рэжыму цішыні» з суботы, 11 кастрычніка.

Са слоў Аляксандра Захарчанкі, праз пяць дзён з лініі судакранання апалчэнцаў і сілавікоў пачнецца адвод артылерыі і цяжкай тэхнікі, паведамляе РІА «Новости».

«З сённяшняга дня павінен наступіць «рэжым цішыні». Пасля таго, як ён будзе доўжыцца пяць дзён, пачнецца адвядзенне артылерыі і цяжкай тэхнікі», - заявіў Захарчанка на брыфінгу. Лідэр ДНР адзначыў, што адвод вайсковай тэхнікі будзе праводзіцца пад кантролем АБСЕ.

7 кастрычнік «рэжым цішыні» у Данбасе быў абвешчаны Радай нацыянальнай бяспекі і абароны Украіны. Увядзенне рэжыму азначае, што ў зоне спецаперацыі павінны быць спыненыя баявыя дзеянні і абстрэлы.

Акрамя таго, Захарчанка яшчэ раз заявіў, што апалчэнцы і ўкраінскія сілавікі падпісалі пагадненне аб лініі размежавання. Са слоў Захарчанкі, за аснову лініі размежавання была прынятая «лінія вядзення баявых дзеянняў на 19 верасня» (калі ў Менску прадстаўнікі Кіева і ДНР дамовіліся аб стварэнні буфернай зоны паміж супрацьлеглымі бакамі). Пагадненне аб межах буфернай зоны, са слоў Захарчанкі, ён і генерал-лейтэнант Юрый Думанскі (кіраўнік групы кантролю і каардынацыі пытанняў спынення агню) падпісалі 9 кастрычніка.

Падчас брыфінгу Захарчанка закрануў тэму надыходзячай зімы - з яго слоў, таго вугалю, які апалчэнцы «паспелі здабыць і складаваць, хопіць на дзве зімы».

10 кастрычніка Захарчанка ўжо заяўляў, што «ўлады» ДНР падпісалі з Кіевам дагавор аб межах буфернай зоны паміж сіламі апалчэння і ўкраінскай арміяй. Згодна з лініі размежавання, пад кантролем Кіева застаюцца Марыупаль, Славянск і Краматорск, а ДНР атрымлівае пад кантроль Пескі, Марьінку і сяло Першамайскае.

Пасля гэтага прадстаўнік РНБА Украіны Андрэй Лысенка заявіў, што заявы Захарчанкі «адносна размежавання ў зоне АТА і здачы ўкраінцамі шэрагу населеных пунктаў з'яўляюцца адкрытай хлуснёй і правакацыяй». З нагоды адводу цяжкай вайсковай тэхнікі ад лініі судакранання сіл апалчэння і ўкраінскай арміі, Лысенка 8 кастрычніка заяўляў, што гэта будзе магчыма толькі ў тым выпадку, калі цягам дня з моманту аб'явы рэжыму цішыні «ніхто не зробіць ні аднаго стрэлу, толькі адзін стрэл прагучаў, усё - рэжым не захоўваецца».

Пагадненне аб стварэнні буфернай зоны паміж украінскімі сілавікамі і апалчэнцамі было дасягнутае 19 верасня ў Менску. Буферная зона фарміруецца на аснове лініі судакранання бакоў канфлікту.