Браты Ратэнбэргі пазбаўляюцца ад актываў, перадаючы іх дзецям

Аркадзь і Барыс Ратэнбэргі перадаюць долі ў кампаніях, што належалі ім, сваім сынам.

Аб гэтым піша выданне «Ведомости».

Аркадзь Ратэнбэрг выйшаў з капіталу «Мостотреста», вынікае з матэрыялаў кампаніі: уладальнікам 68,5% Marc O'Polo Investments Ltd. (у яе 38,6% «Мостотреста») стаў Ігар Ратэнбэрг, а ў канцы 2013 тыя ж 68,5% былі ў Ігара і Аркадзя Ратэнбэрга. (Астатнія 31,5% «Мостотреста» належаць бенефіцыярам «Н-трансу» Мікіту Мішыну, Канстанціну Мікалаеву і Андрэю Філатаву; 29,4% «Мостотреста» - у НПФ «Дабрабыт», астатняе - у мінарытарыяў.)

У ліпені 2014 Аркадзь Ратэнбэрг выйшаў з капіталу TPS Real Estate Holding, якой належаць 100% «ТПС нерухомасці». Ягоная доля ў дэвелаперскіх актывах перайшла сыну Ігару, распавялі два чалавекі, блізкіх да бізнэсоўца: гаворка ідзе не толькі аб кампаніі «ТПС нерухомасць», дзе бізнэсоўцу належала блізу 33% акцый, але і пра «РГ-Девелопмент», які ў лютым паведаміў, што Аркадзь Ратэнбэрг - асноўны ягоны ўладальнік. Прадстаўнікі абедзвюх кампаній ад каментароў адмовіліся. Акцыянерамі дэвелаперскай кампаніі засталіся былыя ўладальнікі Наварасейскага марскога гандлёвага порта Аляксандр Панамарэнка і Аляксандр Скарабагацька. Аркадзь Ратэнбэрг разам з імі застаўся саўладальнікам TPS Avia Group з актывамі ў аэрапорце «Шарамеццева».

Барыс Ротенбэрг прадаў сыну Раману (віцэ-прэзідэнту хакейнага клуба СКА) долю ў бізнэсе ў Фінляндыі: 50% Arena Events Oy (Раман Ратэнбэрг - яе гендырэктар), якой належыць Hartwall Arena, гатэль Langvik і 49% хакейнага клуба Jokerit. Пра гэта распавёў Раман Ратэнбэрг. Яшчэ 0,5% Arena Events Oy Раману Ратэнбэргу прадаў Генадзь Цімчанка, скараціўшы долю ў кампаніі да 49,5%, паведаміў прадстаўнік Volga Group (холдынг Цімчанкі).

Адбылася змена пакаленняў, але ўгода прайшла на рынкавых умовах, інакш не было б дазволу МЗС Фінляндыі, паведаміў Раман Ратэнбэрг, але коштаў не назваў. Угода планавалася год таму, але праз палітычную сітуацыю запаволілася, прыйшлося атрымліваць узгаднення розных службаў і інстанцый, працягвае ён: «Для фінансавання выкупу пакета я прыцягваў пазыковыя сродкі».

Паводле ацэнкі генеральнага дырэктара кампаніі CBRE Уладзіміра Пінаева, кошт Hartwall Arena складае $100-135 млн.

Аркадзь і Барыс Ратэнбэргі застаюцца ўладальнікамі «СМП банка», паведаміў прадстаўнік банка. Паводле звестак СПАРК на 10 верасня, яны застаюцца ўладальнікамі і «Стройгазмонтажа». Звязацца з прадстаўніком кампаніі не атрымалася.