Беларусам дазволілі ездзіць у ЕЗ з двума пашпартамі

Вандроўнікі атрымалі магчымасць прыязджаць у шэнгенскую зону з двума пашпартамі - дзеючым і тым, у якім пастаўленая віза.

Нягледзячы на адзінае заканадаўства ЕЗ аб правілах уезду для замежнікаў, шматлікія візавыя тонкасці ўсё яшчэ дастаўляюць клопаты добрасумленным падарожнікам. Нядаўна Суд ЕЗ ліквідаваў адну з прычын для турботы: вандроўнікі атрымалі магчымасць прыязджаць у шэнгенскую зону з двума пашпартамі - дзеючым і тым, у якім пастаўленая дзейная беларуская віза, пішуць «Беларускія навіны».

З такой сітуацыяй чалавек нярэдка сутыкаецца, калі робіць сабе новы пашпарт (напрыклад, з прычыны запаўнення чыстых старонак у ранейшым), а папярэдні, у якім стаіць дзеючая віза, паводле заявы грамадзяніна застаецца на руках, хоць і становіцца пры гэтым несапраўдным.

У такім выпадку беларускія аддзелы ўнутраных спраў у грамадзянстве анулююць усе старонкі ў старым пашпарце, акрамя старонкі з дзеючай шматразовай візай, паколькі ануляванне візы - гэта кампетэнцыя краіны, якая яе выдала. Такім чынам, некаторы час дазваляецца мець на руках абодва пашпарты.

Раней вандроўнікі рабілі паездкі ў еўрапейскія краіны з двума пашпартамі на руках на свой страх і рызыку. Памежныя органы некаторых краін ЕЗ, у тым ліку Літвы, на падставе свайго нацыянальнага заканадаўства ў такіх выпадках адмаўлялі ва ўездзе.

З тых часоў заканадаўства ЕЗ наконт візавых правілаў і правілаў уезду некалькі гарманізавалася. Аднак супярэчлівае стаўленне да падарожнікаў з двума пашпартамі на руках сярод краін Еўрасаюза засталося. Вандроўнікі працягнулі дзяліцца досведам на форумах і гадаць, пусцілі б іх памежнікі той ці іншай краіны ЕЗ. Турыстычныя парталы і еўрапейскія арганізацыі сістэматызавалі інфармацыю аб тым, у якіх краінах дзеянне забароненае заканадаўствам.

І вось - доўгачаканая развязка. У верасні 2014 Суд Еўрапейскага звязу вынес вердыкт паводле справы AirBaltic. І пастанавіў, што краіны шэнгенскай дамовы не маюць права забараняць уезд на сваю тэрыторыю ў такіх выпадках.

Па-першае, пастанавіла вышэйшая судовая інстанцыя Еўразвяза, ануляванне праязнога дакумента не значыць, што пастаўленая ў ім шэнгенская віза аўтаматычна становіцца несапраўднай.

Па-другое, аналіз нормаў заканадаўства ЕЗ паказвае, што ўезд замежных грамадзян на тэрыторыю не павінен абумоўлівацца наяўнасцю сапраўднай візы непасрэдна ў сапраўдным праязным дакуменце.

Па-трэцяе, нацыянальныя заканадаўчыя нормы дзяржаў, якія ў падобных выпадках забараняюць уезд на сваю тэрыторыю, супярэчаць Шэнгенскаму Памежнаму кодэксу, а значыць, прызнаюцца несапраўднымі.

Сам вердыкт стаў вынікам судовых разглядаў у Латвіі, якія пачаліся яшчэ ў 2010 годзе. З Масквы ў Рыгу самалётам авіякампаніі AirBaltic прыляцеў грамадзянін Індыі, у якога быў сапраўдны пашпарт без візы і несапраўдны - з доўгатэрміновай італійскай візай. Латвійскія памежнікі адмовілі індусу ва ўездзе на той падставе, што ён нібыта не мае сапраўднай візы. Ды яшчэ і наклалі штраф у памеры 2000 латаў (каля 4000 даляраў) на авіякампанію на падставе транспарціроўкі ў Латвію чалавека без праязнога дакумента, неабходнага для перасячэння мяжы.

У выніку, рэгіянальны адміністрацыйны суд, разглядаючы апеляцыю AirBaltic, і звярнуўся да Суда ЕЗ за інтэрпрэтацыяй заканадаўства.