Пенсіянер з Шатландыі знайшоў скарбы вікінгаў

Скарбашукальнік Дэрэк Макленан выявіў скарбы вікінгаў пры дапамозе звычайнага металашукальніка.

Больш за 100 артэфактаў - у тым ліку брошкі, бранзалеты і срэбны крыж - былі закапаныя ў полі ў графстве Дамфрыс на паўднёвым захадзе Шатландыі. Кошт знаходкі ацэньваецца ў шасцізначную суму. Са слоў экспэртаў, гэта адна з самых буйных калі-небудзь знойдзеных схованак вікінгаў, паведамляе BBC.

У мінулым годзе Макленан ужо знаходзіў адзін скарб, раскапаў велізарнае сховішча сярэднявечных срэбных манет.

Сярод прадметаў, выяўленых на гэты раз, найбольшую цікавасць уяўляе ранні хрысціянскі крыж, датаваны IX-X стагоддзем. Ён выкананы з суцэльнага кавалка срэбра і пакрыты ўзорамі эмалі, якія экспэрты ўважаюць за вельмі незвычайныя.

Немалую цікавасць уяўляе і посуд эпохі Каролінгаў - магчыма, самы вялікі з вядомых на сённяшні дзень, - на якім нават захавалася вечка. Ён быў выраблены раней астатніх прадметаў і, як мяркуецца, да моманту, калі скарб быў закапаны, у сярэдзіне IX або пачатку X стагоддзя, сасуду ўжо было каля 100 гадоў.

Прага прыгод

Сам Макленан распавядае, што ў той дзень, калі ён выявіў скарб, ён быў хворы, але прага прыгод прымусіла яго ўстаць з ложка і ўзяць у рукі металашукальнік.

Атрымаўшы дазвол абшукаць поле, ён правёў у пошуках каля гадзіны, перш чым наткнуўся на нейкі прадмет. Спачатку пенсіянер наважыў, што гэта звычайная срэбная лыжка, але потым зняў з металу бруд і ўбачыў характэрны арнамент вікінгаў.

Далейшыя раскопкі выявілі цэлае пахаванне - больш за сотню залатых і срэбных прадметаў, у тым ліку пісчае пяро, металічны посуд, бранзалеты, брошкі і іншыя ўпрыгажэнні.

Са слоў экспэрта Нацыянальнага музея Шатландыі Сцюарта Кэмпбэла, дыяпазон матэрыялаў, выкарыстаных пры выкананні артэфактаў, настолькі шырокі, што можна сцвярджаць: скарбашукальнікам яшчэ ніколі не трапляліся такія цікавыя знаходкі.

«Тут ёсць матэрыялы з Ірландыі, са Скандынавіі, з розных месцаў Цэнтральнай Еўропы - магчыма, прывезеныя [у Шатландыю] на працягу пары стагоддзяў. Каб сабраць такую калекцыю, спатрэбілася нямала намаганняў», - тлумачыць ён.