Заходнія СМІ нагадалі Расеі, што кошт нафты дапамог раскідаць СССР

Падзенне сусветнага кошту нафты можа ўдарыць па эканоміцы краін-экспарцёраў Расеі ды Ірану мацней, чым санкцыі.

Пра гэта ў сваім артыкуле піша карэспандэнт The Los Angeles Times Пол Рыхтэр, пераклад публікуе Інапрэса.

"Шэраг аналітыкаў мяркуе, што зніжэнне нафтавых коштаў можа быць доўгатэрміновай тэндэнцыяй, бо свет актыўна асвойвае тэхналогіі, пры якіх выкарыстоўваецца менш бензіну, напрыклад электрамабілі і больш эфектыўныя сістэмы ацяплення", - адзначае Рыхтэр. Іншым фактарам з'яўляецца нарастанне выкарыстання тэхналогіі гідраразрыву пласта - гэта спрыяла імкліваму ўздыму вытворчасці энэргіі ў ЗША, Канадзе ды іншых краінах.

"Кошт нафты мае велізарную важнасць для Расеі, аднаго з вядучых сусветных экспарцёраў энэргарэсурсаў. Скарачэнне кошту нафты на дзве траціны ў сярэдзіне 1980-х нанесла ўдар па дзяржаўнай уладзе ў Савецкім Саюзе і спрыяла яго распаду ў 1991 годзе", - нагадвае аўтар.

"Эканамічны ціск, як чакаецца, не паўплывае на агрэсіўныя спробы Пуціна захаваць значны ўплыў Расеі ва Украіне, што, на ягоную думку, не падлягае абмеркаванню. Але ягоная палітыка выклікае напружанасць што да расейскай элітай і бізнэс-істэблішмэнту - двума апорамі, якія забяспечваюць Пуціну палітычную падтрымку", - разважае Рыхтэр.

Расейскія банкі звярнуліся да Пуціна з просьбай аб фінансаванні, каб кампенсаваць эфект заходніх санкцый, якія забараняюць ім браць крэдыты на Захадзе, але, паколькі прыбытак ад продажу нафты складае палову даходаў ягонага ўраду, магчымасці Пуціна выдаць гэтыя грошы абмежаваныя, гаворыцца ў артыкуле.

"Пуцін абяцаў пэўны ўзровень стабільнасці ў алігархічнай сістэме, так што ўсё гэта дрэнна адгукнецца для яго", - мяркуе Юджын Рамер, экспэрт наконт Расеі з Carnegie Endowment for International Peace (Вашынгтон). Паколькі спатрэбіцца час, каб санкцыі, уведзеныя ў гэтым годзе, дасягнулі свайго поўнага эфекту, падзенне кошту нафты "выклікае цяпер найбольшую занепакоенасць", на думку Рамера.

"Расейскі міністр фінансаў заявіў на мінулым тыдні, што Крэмль не зможа дазволіць сабе разлічаны на 10 гадоў план мадэрнізацыі абароны коштам у 720 млрд даляраў, які быў прыярытэтным для Пуціна, і яму давядзецца задавольвацца меншым", - адзначае журналіст.

Фота: Bloomberg