Місія АБСЕ пацвердзіла парушэнне перамір'я ў Данбасе сепаратыстамі

Спецыяльная маніторынгавая місія АБСЕ ва Украіне пацвердзіла абстрэл пасёлка Сартаны ля Марыупаля з пазіцый сепаратыстаў.

Пра гэта гаворыцца ў апублікаванай у сераду справаздачы місіі АБСЕ, піша УНН.

Паводле звестак назіральнікаў, абстрэл вёўся з пазіцый, дзе размяшчаліся невядомыя, верагодна нерэгулярныя ўзброеныя фармаванні, якія ўваходзяць у ДНР.

"Украінскі афіцэр...пазней паведаміў місіі, што абстрэл быў накіраваны на ўкраінскі вайсковы блокпост у 1 км на ўсход ад пасёлка Сартаны (19 км на паўночны ўсход ад Марыупаля). Іншая крыніца паведаміла місіі, што сем чалавек былі забітыя і ад 10 да 15 чалавек атрымалі раненні ў выніку абстрэлу", - гаворыцца ў справаздачы місіі АБСЕ.

Назіральнікі адзначылі, што прыбылі ў Сартану а 17:00 і ўбачылі на зямлі рэшткі ракеты Граду.

"Іх размяшчэнне меркавала, што ракета была запушчаная з усходу", - гаворыцца ў справаздачы АБСЕ.

Са слоў назіральнікаў, мужчына, верагодна міліцыянт у цывільным, паведаміў ім, што ў выніку абстрэлу сем чалавек былі забітыя і 15 параненыя.

"Місія пакінула пасёлак праз 15 хвілін у сувязі з пастаяннымі артабстрэламі, якія, паводле ацэнкі назіральнікаў, мелі месца паміж украінскімі ваеўнікамі на КПП на ўсход ад пасёлка і невядомымі, верагодна нерэгулярнымі ўзброенымі сіламі, якія ўваходзяць у "Данецкую народную рэспубліку", размешчанымі далей на ўсход", - гаворыцца ў справаздачы АБСЕ.

Паводле звестак маніторынгавай місіі, у Марыупальскай лякарні дзяжурны лекар паведаміў ім, што 14 чалавек - сем мужчын і сем жанчын ва ўзросце паміж 33 і 65 - былі прынятыя медустановай.

"Двое з гэтых 14 чалавек былі сур'ёзна параненыя, са слоў лекара, шрапнэллю. У лякарні праваслаўны святар, які сцвярджаў, што быў на месцы здарэння адразу пасля нападу, распавёў місіі, што ён бачыў некалькі трупаў. Ён дадаў, што ўкраінскія вайскоўцы аказалі першую дапамогу пацярпелым", - гаворыцца ў справаздачы.