Пуцін шантажуе Еўропу пастаўкамі газу
2- 16.10.2014, 9:02
- 9,330
Прэзідэнт Расеі намякнуў на магчымыя праблемы з пастаўкамі газу ў Еўропу.
Пра гэта Уладзімір Пуцін заявіў у інтэрв'ю сербскай газеце «Палітыка», тэкст якога апублікаваны на сайце Крамля.
«Калі ж казаць аб далейшых перспектывах экспарту газу з Расеі ў Еўропу, то відавочна, што праблема транзіту праз украінскую тэрыторыю пакуль захоўваецца. Адна з відавочных пастаноў - гэта дыверсіфікацыя маршрутаў паставак», - заявіў прэзідэнт Расеі.
«У сувязі з гэтым разлічваем, што Еўракамісія бліжэйшым часам урэгулюе нарэшце пытанне аб выкарыстанні на поўную магутнасць газаправода OPAL», - адзначыў ён. Акрамя таго, са слоў Пуціна, неабходна разблакаваць сітуацыю з «Паўднёвым патокам». «Перакананыя, што гэты праект унясе адчувальны ўклад у комплексную энэргетычную бяспеку Еўропы. Ад гэтага выйграюць усе: і Расея, і еўрапейскія спажыўцы - уключаючы Сербію», - рэзюмаваў расейскі лідэр.
Гаворачы аб супрацоўніцтве РФ і Сербіі ў гэтым кірунку, расейскі прэзідэнт адзначыў, што сукупны аб'ём расейскіх капіталаўкладанняў у Сербіі перавысіў 3 мільярды даляраў, і асноўная частка гэтых сродкаў накіраваная ў стратэгічна важную энэргетычную галіну. «Наглядным прыкладам нашага паспяховага супрацоўніцтва служыць кампанія «Нафтавая індустрыя Сербіі», якая са стратнага прадпрыемства ператварылася ў асноўнага донара сербскага дзяржаўнага бюджэту», - паведаміў Пуцін.
«Рэалізацыя праекта «Паўднёвы паток» павінна прынесці Сербіі звыш 2 мільярды еўра новых інвестыцый, істотна ўмацаваць энэргетычную бяспеку краіны», - мяркуе расейскі лідэр.
OPAL з'яўляецца працягам газаправода «Паўночны паток» і працягнуты з Нямеччыны ў Чэхію. Еўракамісія і Федэральнае сеткавае агенцтва ФРГ дазволілі «Газпраму» выкарыстоўваць толькі палову магутнасцяў OPAL, агульная прапускная здольнасць якога складае 36 мільярдаў кубаметраў у год. Развязванне пытання аб 100-адсоткавым выкарыстанні чакалася ў пачатку сакавіка 2014 года. Аднак у сувязі з украінскім крызісам Еўракамісія адклала разгляд гэтага пытання да восені.