Расейцаў папярэдзілі пра падзенне заробкаў

Праз стагнацыі ў эканоміцы працадаўцы неахвотна павышаюць заробкі, а інфляцыя «з'ядае» надбаўкі, зробленыя ў пачатку года.

У выніку расейцаў, занятых у прыватным сектары, чакае адно з самых сур'ёзных за апошнія гады падзенне рэальных заробкаў паводле вынікаў года, піша РБК.

Паводле разлікаў HayGroup, на 1 чэрвеня рост намінальных заробкаў склаў 6,8% з пачатку года. Эксперт у даследаваннях HayGroup ў Расеі Ірына Чарназубава кажа, што з тых часоў істотных змен гэтага паказчыка не адбылося. Пры гэтым інфляцыя на 1 верасня склала 5,6%. Такім чынам, да пачатку восені рост рэальных заробкаў склаў 0,8%.

«Паводле нашай статыстыкі, вялікая частка кампаній робіць павышэнне заробкаў са студзеня да красавіка, у чацвёртым квартале вельмі малая колькасць кампаній плануе павышаць заробак. У асноўным тыя павышэнні, якія прагназуюцца кампаніямі, яны прагназуюцца са студзеня месяца», - кажа Чарназубава.

У звычайнай сітуацыі зарплаты індэксуюцца аднойчы, часам два разы на год, разважае кіраўніца аддзела аналітыкі Рэкрутынгавага парталу Superjob.ru Валерыя Чарняцова. «Але цяпер сітуацыя такая, што многія кампаніі проста замарозілі кампенсацыю», - кажа яна.

Гэта азначае, што паводле вынікаў усяго года дынаміка рэальных заробкаў можа сысці ў мінус. Паводле звестак Расстата, інфляцыя ў гадавым вымярэнні ў канцы верасня склала 6,3%. Пры гэтым Цэнтрабанк прагназуе інфляцыю паводле вынікаў года на ўзроўні 8%, а кіраўнік Падліковай палаты Таццяна Голікава мяркуе, што тэмп росту коштаў можа апынуцца яшчэ вышэйшым. «Да канца года наўрад ці будзе павелічэнне заробкаў, і ў рэальным выражэнні зарплаты праз высокую інфляцыю знізяцца», - пацвярджае Чарназубава.

«Рынкавы сектар, зрабіўшы ў пачатку года крокі ў індэксацыі заробкаў, пакуль не выяўляў імкнення да кампенсацыі работнікам больш высокай інфляцыі», - кажа вядучы эксперт напрамкі аналізу і прагназавання макраэканамічных працэсаў ЦМАКП Ігар Палякоў. З ягоных слоў, што за два апошнія месяцы індэксы рэальных заробкаў былі самыя нізкія за апошнія некалькі гадоў. «Такога не было са студзеня 2010 года», - дадаў ён.