Элізабэт II хоча бачыць чалавечыя твары, а не «мора айфонаў»

Брытанскую каралеўскую сям'ю замучылі падданыя, якія мараць зрабіць сэлфі з асобамі манархаў.

На тое, што «ўвесь час бачыць перад сабой мора айфонаў і айпэдаў замест чалавечых твараў» некамфортна, паскардзіліся каралева Вялікабрытаніі Элізабэт II і яе сын прынц Эндру (герцаг Ёркскі). Віндзары папрасілі абмежаваць выкарыстанне такой тэхнікі для стварэння сэлфі хоць бы на афіцыйных мерапрыемствах, піша Lenta.ru.

Як адзначыў прынц Эндру (другі сын Элізабэт II і яе мужа, герцага Эдынбургскага Філіпа), яго «бянтэжыць і прыводзіць у замяшанне» сталае жаданне публікі здымаць яго на камеры смартфонаў і планшэтаў.

Герцаг Ёркскі падкрэсліў, што не ўважае такія дзеянні за грубыя, аднак яны яго засмучаюць «як праявы новай рэальнасці». Асаблівае здзіўленне ў Эндру выклікаюць такія здымкі падчас яго афіцыйных з'яўленняў на публіцы, якія і так транслююцца на тэлевізіі.

Элізабэт II таксама стамілася ад тых падданых, якія любяць сэлфі. Пра гэта раней у кастрычніку распавёў амбасадар ЗША ў Вялікабрытаніі Мэцью Барзун. У нефармальнай гутарцы падчас яго сустрэчы з каралевай у Букінгэмскім палацы 88-гадовая дама, кажучы пра сэлфі, згадала, што «не зусім прымае гэты феномен».

Брытанцы, якія любяць сваю каралеву, а таксама грамадзяне іншых дзяржаў, якія сімпатызуюць ёй, сапраўды даволі часта імкнуцца зрабіць фота з Элізабэт II. Так, у ліпені 2014 падчас Гульняў Садружнасці, што праходзілі ў Шатландыі, сэлфі з каралеўскай асобай зрабілі маладыя спартоўкі з Аўстраліі.

Што да прынца Эндру, ён не схільны цалкам адмаўляць сэлфі як сацыяльны трэнд і модны парыў. Больш за тое, герцаг Ёркскі стаў першым з брытанскай каралеўскай сям'і, хто выклаў у сетку «самастрэл». Гэта адбылося ў красавіку 2014 года, здымак быў апублікаваны ў запісе герцага ў Twitter.