«Дынама» рыхтуецца з баявым настроем да матчу супраць «Фіярэнціны»
3- 2.10.2014, 14:34
- 5,972
Галоўны трэнер менскага «Дынама» Уладзімір Журавель разлічвае на агрэсіўны футбол у выкананні сваёй каманды сёння.
Матч «Дынама» - «Фіярэнціна» пройдзе на «Барысаў-Арэне» 2 кастрычніка, пачатак а 20:00, піша БелаПАН.
«Будзем адштурхоўвацца ад таго, што дазволіць спаборнік, - сказаў Журавель на прэс-канферэнцыі 1 кастрычніка. - Разлічваем на хуткія контратакі, але і ад пазіцыйных адмаўляцца не будзем. Мы разумеем стыль, патрабаванні і пабудову гульні «Фіярэнціны». Асноўны акцэнт робіцца на валоданні мячом і тэрытарыяльную перавагу».
Трэнер паскардзіўся на тое, што да дыскваліфікаванага Сімавіча і траўміраванага Паліцэвіча і Удожы дадаўся Гутар. Выхад брамніка на поле пад вялікім пытаннем.
Але «настрой добры, баявы», запэўніў Журавель.
Са слоў капітана каманды Дзмітрый Молаша, у «Дынама» нармальная, рабочая абстаноўка.
«Рыхтуемся на пазітыве, - сказаў гулец, адказваючы на адно з пытанняў. - Усе ўстаноўкі ў нас толькі на перамогу. Калі адразу думаць пра нічыю, то гэта няправільна, і яе ніколі не дамагчыся. Але як складзецца - пакажа толькі гульня».
У першым туры 18 верасня «Дынама» саступіла ў Салоніках ПАОК - 1: 6, а «Фіярэнціна» з буйным лікам перамагла французскі «Генгам» - 3: 0.