Лекар «хуткай»: Зарплата — тры мільёны, а рабочыя курткі прымушаюць купляць за свае грошы

З верасня беларускім урачам абяцалі падняць заробкі, але павышэнне было, хутчэй, сімвалічным.

Аднак цяпер пацыенты лічаць, што медыкі «грабуць грошы лапатай», таму што гэта менавіта так падаецца ў афіцыйных СМІ. Як на самой справе выглядаюць будні лекара хуткай дапамогі ў Беларусі і з якімі абсурднымі сітуацыямі ім даводзіцца сутыкацца charter97.org распавяла ўрач хуткай дапамогі Юлія з Гомеля.

- Нядаўна выйшаў указ аб павышэнні зарплаты лекарам. Вы адчулі гэтае павышэнне?

- За верасень мая зарплата была 3 мільёны. Наогул, выйшаў указ аб павышэнні не зарплаты самой па сабе, а тарыфнай стаўкі, якая «забітая» ў тарыфную сетку. І атрымліваецца, што ўказ ёсць, але ён практычна нічога не змяняе. Напрыклад, старэйшая медсястра можа атрымліваць як я, таму што мы «перасекліся» ў гэтай тарыфнай сетцы. У гэтай тарыфнай сетцы ёсць тарыфная стаўка і ёсць памнажальны каэфіцыент - і ад гэтага разлічваецца твая фактычная зарплата. Гэта значыць, у прынцыпе, павысілі невялікую частку заробкаў, якая і то вельмі сумнеўна павышаецца з-за таго, што тарыфная сетка не толькі для лекараў, а таксама для многіх іншых рабочых спецыяльнасцей. А яшчэ акрамя гэтых складнікаў ёсць яшчэ прэміі, надбаўкі за шкоднасць і іншае.

Таму не вельмі зразумела, наколькі гэты ўказ сапраўды павысіў урачам зарплаты. Наколькі я чула размовы ўрачоў - а гэта, натуральна, бурна абмяркоўвалася, - іх зарплаты фактычна амаль не павялічыліся. Кажуць, што надбаўка выйшла, а толку ніякага.

- Але ў СМІ гэта падаецца як сапраўды рост заробкаў.

- Так, і таму нашы пацыенты рэагуюць вельмі дзіўна. Яны абмяркоўваюць нашае «велізарнае» павышэнне заробкаў: «Ты чула, медыкам зарплаты павысілі на 60%, а яны нічога не робяць і дрэнна нас лечаць!». З-за гэтай дэзінфармацыі ў газетах многія пацыенты зараз паводзяць сябе так, быццам мы ім павінны да канца жыцця. У прэсе гаворыцца пра 18%, але ў размовах людзей дзе 18%, там і 20%, а дзе 20%, там і 30%, і гэтак далей. Людзі наогул чамусьці лічаць, што медыкі вельмі шмат атрымліваюць, што мы сядзім і грабем грошы лапатай. Нават калі гэтая пенсіянерка нічога не зрабіла, каб захаваць сваё здароўе ў маладосці, яна лічыць, што вось дык мы цяпер дакладна павінны яе вылечыць ад усіх хвароб.

- Ці хапае ўсяго на станцыі хуткай дапамогі?

- Не, вядома. Мне выдалі форму на станцыі «хуткай»: штаны і «распашонка», з кароткім рукавом. І выдалі тонкую кашулю з доўгім рукавом. А куртку трэба купляць самой, ніякай рабочай не выдаюць. Зараз пачнецца зімовы сезон і прыйдзецца купляць нейкую куртку самой. Я не ведаю, ці павінны яны выдаваць, таму што адказ адзін: «У нас куртак няма». Я пыталася ў калег: яны кажуць, што заказвалі сабе курткі самастойна ў спецыяльных арганізацыях, дзе шыюць рабочую вопратку.

- А як наконт забеспячэння тэхнікай, інвентаром?

- Як правіла, у хуткіх ёсць непрацоўныя партатыўныя кардыёграфы, камусьці можа не хапіць кіслароду... Але прэпараты для аказання дапамогі збольшага ёсць.

- З якім стаўленнем людзей вам даводзіцца сутыкацца на працы?

- Мне здаецца, у Беларусі людзі вельмі дзіўна разумеюць функцыю хуткай дапамогі. Напрыклад, ранні вечар, будны дзень - чалавек яшчэ можа патрапіць у паліклініку, але ён выклікае хуткую нават на той выпадак, які не з'яўляецца экстраным і не патрабуе выкліку «неадкладкі». Але мы ж не можам праігнараваць выклік, таму мы прыязджаем, зніжаем, груба кажучы, чалавеку тэмпературу - і з'яжджаем. Мы не пішам бальнічных, не выдаем ніякіх даведак. Гэта значыць, мы не дапамагаем пацыенту «адкасіць» ад працы ці вучобы, але, тым не менш, людзі працягваюць выкарыстоўваць хуткую такім дзіўным чынам.