Гучная справа: гандляроў спайсам кантралявалі «арганізаваныя» бандыты
12- 3.10.2014, 12:03
- 21,385
У Гомелі наспявае гучны судовы працэс.
Завершана расследаванне крымінальнай справы аб дзейнасці арганізаванай групы, якія кантралявалі гандляроў спайсам. Нядаўна пракуратура Гомельскай вобласці накіравала справу ў суд. Пра тое, што праблема распаўсюджвання курыльных сумесяў абвастрылася да мяжы, сёння кажа статыстыка загубленых лёсаў. Аднак што для адных - памылка і трагедыя, то для іншых - бізнэс, піша «Савецкая Беларусь».
Крымінальны свет, як вядома, чула рэагуе на попыт. Арганізаваная група з дзевяці чалавек, раскрытая ў Гомелі, таму пацверджанне. Начальнік Гомельскага абласнога ўпраўлення барацьбы з арганізаванай злачыннасцю і карупцыяй МУС Андрэй Заяц удакладняе падрабязнасці нетыповай справы:
- Спачатку адзін з фігурантаў быў затрыманы міліцыянтамі за распаўсюд наркотыкаў. Але калі пачалі прапрацоўваць ланцужок, высветлілася: групу гандляроў кантралявалі раней судзімыя, у тым ліку і так званы «крымінальны наглядчык».
Паводле матэрыялаў крымінальнай справы, бізнэс задумаў 23-гадовы гамяльчанін Д., які ўжо меў у біяграфіі судзімасці за рабаванне і збыт наркотыкаў. Прыцягнуў таварышаў-аднагодкаў. Сталі вылічаць прадаўцоў спайса, якім прапанавалі свой «дах» за пэўную плату.
Намеснік начальніка аддзела пракуратуры вобласці Раман Герасімаў знаёміць з некаторымі дэталямі:
- Гэта былі такія ж маладыя людзі, якія наважылі незаконна зарабіць на продажы наркотыкаў. З тымі з іх, хто не згаджаўся, не цырымоніліся. Маглі на вуліцы пасадзіць у аўтамабіль, вывезці ў лес, прывязаць да дрэва, прыгразіць расправай.
Сумы, якія яны аддавалі «заступнікам», былі розныя. Адзін з гандляроў, напрыклад, выплаціў больш за 16 мільёнаў рублёў. Усяго ж паводле справы праходзяць 11 пацярпелых. Неўзабаве актыўную групу заўважылі двое прыяцеляў з багатай крымінальнай біяграфіяй (адзін з іх праходзіў па групоўцы «пажарнікаў»). Пастанавілі моладзь падмяць пад сябе. Тут ужо для застрашвання чарговых супраціўленцаў ў ход пайшло зброя - пісталет, выглядам якога хутка пераконвалі...
Фігуранты ў справе абвінавачваюцца ў стварэнні ўстойлівай арганізаванай групы, якая займалася вымагальніцтвам, выкраданнем людзей і пазбаўленнем іх волі. Дата судовага працэсу будзе неўзабаве прызначаная.