Кіроўца «Формулы-1» знаходзіцца ў крытычным стане пасля аварыі на Гран-пры Японіі
1- 6.10.2014, 11:10
- 11,942
Гонка Гран-пры Японіі, пятнаццатага этапу "Формулы-1", была спыненая на 44-м крузе праз сур'ёзную аварыю французскага кіроўцы Marussia Жуля Б'янкі.
Кіроўца "Формулы-1" разбіўся ў канцы гонкі, ён не справіўся з кіраваннем на мокрай трасе і рэзнуўся ў эвакуатар, які перавозіў аўто кіроўцы Sauber Адрыяна Сутыля, які сышоў з дыстанцыі, піша БелТА.
Лекары ў японскім горадзе Ёкаіці змагаюцца за жыццё Жуля Б'янкі, які атрымаў сур'ёзную чэрапна-мазгавую траўму. Яго стан ацэньваецца як крытычны. Паводле апошніх звестак, аперацыя ўжо закончаная. Гоншчык пачаў дыхаць самастойна. Як гаворыцца ў заяве Міжнароднай аўтамабільнай федэрацыі, пасля аперацыі кіроўцу перавядуць у рэанімацыю.
Два месяцы таму яму споўнілася 25 гадоў.
Перад пачаткам гонкі сіноптыкі папярэджвалі аб тайфуне "Фанфон", што насоўваўся, аднак прамоўтэры Гран-пры адмовіліся пераносіць спаборніцтвы - кантракты з тэлекампаніямі былі больш важныя за штармавыя папярэджанні. У выніку гонка праходзіла ў складаных варунках надвор'я. З самага старту ішоў моцны лівень, кіроўцы скардзіліся на дрэнную бачнасць і моцныя заносы.
Праз трагічную аварыю гонка была закончаная датэрмінова. Пераможцам стаў брытанец Льюіс Хэмілтан з Mercedes.
Фота: EFE/EPA/HIROSHI YAMAMURA