Акцыя салідарнасці паслоў пры АБСЕ ва Украіне праходзіць без Беларусі
4- 8.10.2014, 20:33
- 5,787
Да прадстаўнікоў 34 краін пры АБСЕ, якія робяць візіт ва Украіну, далучыўся амбасадар ЗША ў арганізацыі Дэніэл Бэер.
У гэтай паездцы бярэ ўдзел большасць чальцоў Сталай рады Арганізацыі бяспекі і супрацоўніцтве ў Еўропе. Аднак сярод дыпламатаў няма кіраўніка прадстаўніцтва Беларусі пры АБСЕ, былога намесніка міністра замежных спраў краіны Валерыя Варанецкага, перадае «Радыё Свабода» .
Як паведамілі ў прэс-службе замежнапалітычнай установы Беларусі, дыпламат, які адначасова з'яўляецца і паслом Беларусі ў Аўстрыі, «цяпер знаходзіцца ў Вене».
Інфармацыю пра паездку прадстаўнікоў краін АБСЕ ва Украіне распаўсюдзіла місія ЗША пры гэтай міжнароднай арганізацыі:
«Гэта спосаб прадэманстраваць нашую падтрымку народу і ўраду Украіны, - заявіў пасол ЗША пры АБСЕ Дэніэл Бэер, - І пачуць з першых вуснаў аб праблемах, з якімі яны сутыкаюцца ў плане рэагавання на гвалт, які распальваецца звонку, выкарыстаць магчымасці выбраць новы парламент і хутка правесці рэформы, здольныя прынесці вынікі».