П'яны адзінарос чапляўся да японскай дэлегацыі і даводзіў, што «Курылы - нашы»
14- 9.10.2014, 10:11
- 26,797
Яму прапанавана скласці паўнамоцтвы.
Дэпутату гарадской думы Томска прапанавалі добраахвотна скласці з сябе паўнамоцтвы пасля п'янай выхадкі, у якой апынуліся і японцы. Калегі звярнуліся да адзінароса Сцяпана Рудэнкі з гэтай прапановай пасля таго, як ён чапляўся да японскай дэлегацыі ў нецвярозым стане.
Як паведамляе сайт «Байкал24», інцыдэнт адбыўся ў адной з мясцовых кавярань, дзе размясціліся дэлегаты з Японіі. У Томск японцы прыбылі для ўдзелу ў саміце азіяцкіх гарадоў. Рудэнка разам з сябрамі сядзеў у той жа ўстанове, за суседнім столікам. З невядомых прычынаў дэпутат пастанавіў падсесці да японскай дэлегацыі і пагутарыць з яе сябрамі. Палітык заяўляў на ламанай ангельскай, што ён «дэпутат, парламент і ўлада», а таксама хацеў данесці да японскай дэлегацыі, што «Курылы - нашы выспы».
Пры гэтым адзінарос не звярнуў увагі на супрацоўніка дэпартамента міжнародных сувязяў абласной адміністрацыі, якая неаднаразова спрабавала паказаць яму, што ён спрабуе весці гутарку з афіцыйнай дэлегацыяй. У выніку вячэру прыйшлося завяршыць, і госці накіраваліся ў гатэль. Пасля інцыдэнту начальнік абласнога дэпартамента звярнуўся ў гарадскую думу Томска з просьбай разабрацца ў сітуацыі.
Сам Рудэнка пракаментаваў тое, што здарылася. Дэпутат заявіў, што сітуацыя была бесканфліктнай, а камунікаваў з афіцыйнай дэлегацыяй ён «як радавы грамадзянін». Рэгламент томскай гарадской думы не прадугледжвае працэдуры пазбаўлення дэпутатаў мандата. Таму на пасяджэнні гарадскога парламента 8 кастрычнік дэпутаты прапанавалі свайму калегу самому скласці паўнамоцтвы, даўшы яму месяц на разважанні.