Аглядальнік «Саўбеліі» назваў беларускіх футбалістаў «дурнямі»

Сяргей Канашыц абразіў гульцоў зборнай Беларусі ў футболе.

Напярэдадні адборачнага матчу чэмпіянату Еўропы-2016 паміж футбольнымі зборнымі Беларусі і Украіны «Прессбол» збудаваў традыцыйны «Пралог на траіх», у якім прынялі ўдзел журналіст выдання Сяргей Мардасевіч, карэспандэнт украінскай газеты «Каманда» Валерый Навабранец і спартыўны аглядальнік «Савецкай Беларусі» Сяргей Канашыц, піша «Салiдарнасць».

Зразумела, не абышлося без успамінаў аб ганебным старце каманды Георгія Кандрацьева ў Люксембургу. Украінскі журналіст выказаў здагадку, што «гэтая аплявуха можа завесці гульцоў і трэнераў». На што Канашыц адрэагаваў так:

- Мне здаецца, што яна (зборная) праз яе (ганьбу) не моцна і перажывала. Звычка - другая натура, а нашы футбалісты, на жаль, ужо столькі разоў атрымлівалі нагой па адным месцы, што пятая кропка прымаць гэтыя ўдары прывыкла. Адаптавалася. Пакрылася луской.

Гэта толькі на першых уроках чырванееш, калі ўрок не вывучыў і з двойкай ў дзённіку дадому ісці страшна, а потым ты проста двоечнік і ўсё. Наша зборная сёння - двоечнік. Можа, гэта і гучыць для яе крыўдна, затое - чыстая праўда. Дурні і ахламоны, кажучы простай шкалярскага мовай.