Бізнэс па-беларуску: у Гародні адкрылі магазін з назвай «H&M»

Многія жыхары Гародні звярнулі ўвагу на новы магазін у цэнтры горада са знаёмым лэйблам H&M.

Першапачаткова людзі думалі, што ў горадзе адкрыўся ўсімі вядомы сусветны брэнд. Але, калі прыгледзецца больш уважліва, становіцца зразумела, што тут нешта не так. Пра асаблівасці бізнесу па-беларуску піша «Твой стыль».

На жаль, цуду не адбылося. Шведскі брэнд не прыйшоў у Беларусь, што адразу становіцца зразумела, варта толькі зайсці ў краму. Уладальнікі гандлёвай кропкі тлумачаць, што гэта не H&M, а крама адзення «Новы і Модны».

Многія пакупнікі расчараваныя і кажуць, што гэта плагіят. Каб разабрацца ў тым, што адбываецца, пытанне аб занадта падобнай назве журналісты задалі ўладальніку крамы.

«Звяртаю вашую ўвагу, што назва крамы -«Новы і Модны»(ім). Назва нараджалася ў пакутах у імкненні хоць неяк прыцягнуць увагу патэнцыйных пакупнікоў. Станавіцца звычайнымі «Вобразамі», «Абліччамі», «Стылямі» і іншымі збітымі слоўцамі нам не хацелася. Трэба было вылучыцца. Таму вырашылі выкарыстаць правакацыйны маркетынгавы ход і назвацца так, як назваліся. Людзі рэагуюць па-рознаму: ад усмешак і адабрэння да непрымання. Камусьці падабаецца, і людзі з задавальненнем знаёмяцца з асартыментам, а нехта выскоквае ў праведным гневе. У нашай краме прадстаўленыя вядомыя еўрапейскія брэнды, разлічаныя на сучасных, модных, стыльных маладых людзей, якія цэняць свой час, еўрапейскую якасць і разумныя кошты», - запэўніў уладальнік крамы.