Рассельгаснагляд забракаваў шэсць тон субпрадуктаў з Беларусі

На частцы сыравіны адсутнічалі клеймы і маркіроўка, некаторыя віды субпрадуктаў ішлі зусім без упакоўкі.

Забаронены ўвоз у Расею каля шасці тон замарожанай сыравіны жывёльнага паходжання, выпрацаванага мясаперапрацоўчымі камбінатамі Рэспублікі Беларусь. Як паведамляе БелаПАН са спасылкай на ўпраўленне ў Бранскай і Смаленскай абласцях Федэральнай службы ветэрынарнага і фітасанітарнага нагляду РФ, тавараадпраўшчыкам з'яўлялася прыватнае прадпрыемства, зарэгістраванае ў Менску.

Груз спынены ў раёне населенага пункта Чырвоная Горка. Як выявіла кіраванне Рассельгаснагляду, ён ехаў у Маскоўскую вобласць і ў адпаведнасці з ветэрынарным сертыфікатам неапрацаваныя ялавічныя вушы, страваводы, станавыя жылы, трахеі і лапатачныя храсткі былі прызначаныя для рэалізацыі без абмежаванняў.

На частцы сыравіны адсутнічалі клеймы і маркіроўка, якія пацвярджаюць правядзенне ветэрынарна-санітарнай экспертызы, некаторыя віды субпрадуктаў ішлі зусім без упакоўкі.

Акрамя таго, у склад грузу ўваходзіла прадукцыя ААТ «Аршанскі мясакансервавы завод» і ААТ «Бабруйскі мясакамбінат». Паколькі з 28 кастрычніка 2014 г. уведзеныя абмежаванні на пастаўку прадукцыі ў Расейскую Федэрацыю з названых прадпрыемстваў, у інспектараў Рассельгаснагляду паўсталі пытанні да законнасці ўвозу.

Нагадаем, Рассельгаснагляд у кастрычніку заявіў пра выяўленне геному афрыканскай чумы свіней у прадукцыі Бабруйскага, Аршанскага, Менскага і Магілёўскага мясакамбінатаў. Пастаўкі свініны з Беларусі ў Расею часова прыпыненыя.