«Палец - гэта тое, што не страціш і не забудзешся»

Нягледзячы на пратэсты бацькоў, берасцейская гімназія з панядзелка пачне прапускаць дзяцей, скануючы адбіткі пальцаў.

Берасцейская гімназія №4 запускае з 24 лістапада ў тэставым рэжыме новую сістэму бяспекі: на ўваходзе ў дзяцей будуць сканаваць адбіткі пальцаў. Адміністрацыя навучальнай установы запэўнівае, што гэтая мера дазволіць абмежаваць доступ непажаданых асоб. Напярэдадні новую сістэму ўжо апрабавалі: пальчыкі «знялі» ў 100 навучэнцаў. «Ноў-хаў» прыйшлося не даспадобы некаторым бацькам: 20 чалавек напісалі калектыўную скаргу кіраўніку Берасцейская гарвыканкама і ў пракуратуру, паведамляе «Еўрарадыё».

Дырэктар гімназіі Алена Шкулепа паведаміла Еўрарадыё, што падставы для хваляванняў яна не бачыць, так як сканіраванне пальцаў - пілотны праект, які ўведзены з верасня і ў некаторых іншых школах краіны.

«Разглядаліся розныя варыянты. Мы жывем у XXI стагоддзі, і сёння пытанне сканавання - гэта не «ноў-хаў», якое мы раптам прапанавалі тут. Гэта адзін з найбольш зручных варыянтаў, які мы разглядалі і з прадстаўнікамі кампаніі, што ўстанаўлівае сістэму. Як зручней: картка? гэта ўсё-ткі дзеці, якія могуць карткі губляць, забываць. Палец - гэта тое, што не страціш і не забудзешся», - кажа Алена Шкулепа.

Абурэнне некаторых бацькоў жанчыну здзіўляе, бо пастанова аб новай сістэме бяспекі была нібыта прынятая адміністрацыяй разам з бацькамі. Гэта зняпраўджвае маці аднаго з гімназістаў Ала, якая, між іншым, з'яўляецца сябрам папячыцельскага савета. З яе слоў, аб новаўвядзенні яна даведалася ад сына, калі таго ўжо «адсканавалі».

«Са мной не абмяркоўвалі гэтую сістэму. Майго сына і мяне абразілі тым, што ў яго ўзялі адбіткі пальцаў без майго ведама. Мы ўсё роўна будзем стаяць на сваім: мы гэтага (новай сістэмы бяспекі - Еўрарадыё) не хочам! Мы будзем хадзіць у школу нават без карткі, таму што ніхто не можа нам гэта забараніць», - кажа Ала.

Адміністрацыя ўстановы прапанавала кампраміс для незадаволеных: устаноўленыя турнікеты прадугледжваюць пропуск і праз асабістую картку. Кошт яе 20 тысяч рублёў, і 50 тысяч будзе каштаваць новая ў выпадку страты.

20 лістапада адбыўся спецыяльны бацькоўскі сход для развязання канфліктных пытанняў. Ала распавядае, што на сходзе прысутнічаў нават супрацоўнік міліцыі - інспектар у справах непаўналетніх. Імаверна, для таго, каб растлумачыць плюсы інавацыйнай сістэмы бяспекі. Але прысутныя зацікавіліся зусім іншым пытаннем:

«Спыталі, ці былі парушаныя правы дзяцей і ці з'яўляецца гэта сканаванне дактыласкапіяй. Міліцыянт сказаў, што ён не ведае. Таксама спыталі, ці можна праводзіць гэтую працэдуру без згоды бацькоў. Ён таксама сказаў, што не ведае».

Берасцейскі праваабаронца Раман Кісляк мяркуе, што адміністрацыя гімназіі не мае права запускаць новую сістэму пропуску без пісьмовай згоды бацькоў.

«Гэта дактыласкапія. Для таго каб запусціць такую сістэму, трэба мець базу звестак. Нават калі скануюць адзін палец, атрымліваецца, што іх ідэнтыфікуюць. А ў гэтым выпадку згоды дзяцей недастаткова. Дзеці не могуць цалкам супраціўляцца парушэнням іх правоў. Гэта кампетэнцыя бацькоў. У бацькоў абавязкова павінны былі ўзяць дазвол, - і не вусны, а пісьмовы», - адзначае ён.

Знайсці кампраміс з незадаволенымі бацькамі адміністрацыі гімназіі не ўдалося. Паралельна са скаргай да кіраўніцтва горада і праваахоўнікаў яны пачалі збор подпісаў за дэмантаж турнікетаў.

Аднак дырэктар гімназіі №4 Алена Шкулепа паведаміла, што пастанова аб увядзенні новай сістэмы прынятая. Запрацуюць турнікеты ўжо ў пачатку наступнага тыдня.