Канюк хоча дамаўляцца з забойцамі і наркадылерамі

У Беларусі можа з'явіцца практыка дасудовага пагаднення аб супрацоўніцтве з падазраваным.

4 лістапада «дэпутаты» прынялі адпаведны законапраект у першым чытанні. Пагадненне плануюць заключаць, калі следства сутыкаецца са складанымі справамі з вялікай колькасцю ўдзельнікаў. Супрацоўніцтва са следствам дазволіць змякчыць пакаранне, але не больш, чым на палову, паведамляе СТВ.

«Калі чалавек заключыў пагадненне і выканаў яго, гэта вельмі сур'ёзна. Там выкананне мае на ўвазе некалькі таксама этапаў, шмат пунктаў. Гэта значыць, трэба ўсё гэта выканаць. Прычым скрупулёзна, да апошняга элемента. Толькі пасля гэтага, калі ён выканаў, суд яшчэ будзе правяраць на судовым пасяджэнні. Толькі пасля гэтага будзе вызначацца пакаранне. І тады ўжо, калі ён усе ўмовы выканаў, больш за палову яму нельга даваць максімальнага тэрміну», - заявіў генеральны пракурор Беларусі Аляксандр Канюк.

Канюк таксама лічыць мэтазгодным стварэнне фонду для кампенсацыі шкоды пацярпелым ад злачынстваў, піша «Інтэрфакс».

«У Беларусі неабходна стварыць фонд для кампенсацыі шкоды пацярпелым ад злачынстваў. Адной з крыніц папаўнення рахунку такога фонду маглі б стаць паступленні ад крымінальна-прававых кампенсацый», - сказаў ён, прэзентуючы ў «палаце прадстаўнікоў» законапраект, якім мяркуецца ўвесці ў Беларусі механізм крымінальна-прававой кампенсацыі.

Аляксандр Канюк адзначыў, што крымінальна-прававая кампенсацыя з'яўляецца мерай матэрыяльнага характару і будзе прымяняцца ў мэтах стымулявання асоб, якія ўчынілі няцяжкія злачынствы, да добраахвотнага загладжвання віны перад грамадствам.

Паводле слоў генпракурора, механізм крымінальна-прававой кампенсацыі накіраваны на павышэнне эфектыўнасці ўжо існых у Крымінальным кодэксе механізмаў, якія дазваляюць не прымяняць да асоб, якія раскаяліся, пакаранне, звязанае з ізаляцыяй ад грамадства.

Пры гэтым генпракурор паведаміў, што сродкі, якія могуць быць прыцягнутыя ў выніку прымянення механізму крымінальна-прававой кампенсацыі, могуць скласці да Br1,5 млрд.