Пад Барысавам Citroen пратараніў школьны аўтобус
- 5.11.2014, 10:13
- 6,645
У аўтобусе знаходзіліся двое дарослых і пяцёра дзяцей.
Пра гэта сайту charter97.org паведамілі ў прэс-службе МНС Беларусі.
«4 лістапада а 14:56 у МНС паступіла паведамленне аб дарожна-транспартным здарэнні, каля вёскі Шабынькі Барысаўскага раёна Менскай вобласці. Школьны аўтобус «МАЗ 241000» сутыкнуўся з аўтамабілем Citroen. У аўтобусе знаходзілася 2 дарослых і 5 дзяцей, якія не пацярпелі», - гаворыцца ў паведамленні.
У легкавым аўтамабілі былі заблакаваныя два пасажыры. Работнікі МНС пры дапамозе гідраўлічнага інструменту дэблакавалі пацярпелых, якія з траўмамі рознай ступені цяжкасці былі шпіталізаваныя.
Для прадухілення ўзгарання паліва ратавальнікі выканалі пенную падушку.