Газпром пагражае звольніць Венедыктава з «Эха Москвы»

Прычынай можа стаць адмова галоўнага рэдактара радыёстанцыі звольніць журналіста Аляксандра Плюшчава.

Пра гэта заявіў старшыня савета дырэктараў холдынгу «Газпром-медыя» Міхаіл Лесін. Ён дапусціў магчымасць адстаўкі галоўнага рэдактара «Эха Москвы» Аляксея Венедыктава, піша РБК.

Як распавёў Лесін, звальненне журналіста радыёстанцыі Аляксандра Плюшчава - справа вызначаная. Калі галоўны рэдактар «Эха Москвы» не пагодзіцца з сыходам журналіста, гэта «цалкам магчыма» скончыцца адстаўкай самага Венедыктава, заявіў старшыня савета дырэктараў холдынгу.

З ягоных слоў, калі справа тычыцца маральных прынцыпаў, на першым месцы павінны быць яны, а не фармальныя прынцыпы статута. Лесін распавёў, што напярэдадні ўвечары размаўляў з галоўным рэдактарам «Эха Москвы» і папярэдзіў яго, што калі Аляксей Венедыктаў не прыме гэтай пастановы, то яе прыме ён - Лесін.

Ён не стаў думаць, які артыкул працоўнага заканадаўства можа быць выкарыстана ў гэтым выпадку - «гэта юрысты разбяруцца», сказаў ён.

У сваю чаргу генеральны дырэктар «Эха Москвы» Кацярына Паўлава адзначыла, што правамернасць звальнення Плюшчава можа разглядаць толькі суд, і яна гатовая да гэтага разбору. Галоўны рэдактар «Эха Москвы» Аляксей Венедыктаў сцвярджае, што вядучы радыёстанцыі Аляксандр Плюшчаў працягне сваю працу на станцыі.

Журналіста Аляксандра Плюшчава, вядучага эфіраў з Данецкага аэрапорта, паспрабавалі звольніць у абыход кіраўніцтва радыёстанцыі за паведамленне пра затанулага сына кіраўніка крамлёўскай адміністрацыі Сяргея Іванова.