Барыс Акунін: Рэжым у Расеі зменіць рэвалюцыя, а Крым - гэта крадзеж

Расейскі пісьменнік Барыс Акунін на літаратурным фестывалі ў Кракаве заявіў, што дзейны рэжым у Расейскай Федэрацыі зменіць рэвалюцыя.

Выступленне Барыса Акуніна ў Кракаве прыводзіць сайт INSIDER:

- Я ўпэўнены, што рэжым у Расеі не трывалы, але зменіцца ён шляхам не эвалюцыйным, а рэвалюцыйным.

Тое, што адбываецца ў краіне апошнія некалькі месяцаў, - гэта прамое следства таго, што адбываецца ва Украіне.

Расея з дзяржавы аўтарытарнай ператварылася ў паліцэйскую дзяржаву.

Пратэсты 2011-2012 гадоў не былі рэвалюцыйнымі. Тут быў пратэст этычны і эстэтычны.

З такіх меркаванняў людзі не забіваюць і не паміраюць.

Пратэсты, якія прыводзяць да барыкад, - гэта пратэсты сацыяльныя, калі людзям дрэнна жывецца.

Сёння Расея - арыстакратычная краіна. Гэта шмат у чым нагадвае тое, што адбываецца 100 гадоў таму ў перыяд рэвалюцыі, у перыяд рэакцыі. Калі здавалася, што імперыя Раманавых перамагла, і цяпер яна назаўсёды. Не выпадкова герб Расеі - птушка з двума галовамі, якія глядзяць у розныя бакі.

У адной з галоў - вялікі мозг, але маленькая дзюба. У другой - здаравенная і жалезная дзюба, але мозг памерам з гарошыну.

Зрокава я ўяўляю краіну так: ёсць цела гэтай птушкі, якая займае 80-90 адсоткаў насельніцтва.

Гэта людзі, якія не цікавяцца палітыкай. Астатнія палітыкай цікавяцца і падзеленыя на дзве партыі, якія спрабуюць круціць краінай.

Сёння мы знаходзімся ў сітуацыі, калі галава з жалезнай дзюбай, здаецца, усіх перамагла і задзяўбла.

Але я вельмі добра бачу, што хутка яна адваліцца да чортавай маці.

Да таго часу, пакуль узровень жыцця неяк падтрымліваецца, людзям не важна, што там наверсе робіцца.

Вось з'явіўся ў нас Крым, думаюць яны, нас жа больш стала - што ў гэтым дрэннага?

А з тэлевізара яны атрымліваюць інфармацыю таго, што адбываецца ў свеце.

А тэлевізар - інструмент прапаганды. І людзі перастануць у яго верыць тады, калі іх прыватнае жыццё будзе станавіцца ўсё горш і горш.

Вось я на адзін дзень зроблены імператарам Расейскай дзяржавы (ці аддаў бы Акунін Крым - адно з першых пытанняў гледачоў, - рэд.).

Я б правёў рэферэндум з працяглай падрыхтоўкай і пад строгім міжнародным назіраннем. І хай самі крымчукі вызначаюць, куды ім рухацца - туды, сюды або самім па сабе.

Я быў у Крыме да ўсёй гэтай гісторыі. І ў мяне склалася ўражанне, што многія людзі не хочуць жыць ва Украіне. Але, па-першае, гэта ж крадзеж сярод белага дня. А па-другое, атрымліваецца, мы жывем у той час, калі галоўная праблема не скрасці нешта, а легалізаваць скрадзенае.