Чарговыя «Дні цвярозасці» могуць прайсці 20 лістапада і 18 снежня

Ініцыятыву, накіраваную на вядзенне здаровага ладу жыцця, ужо пачалі праяўляць мясцовыя ўлады ў рамках правядзення ў краіне Адзіных дзён здароўя.

Прынамсі, як паведамляе партал interfax.by, 20 лістапада і 18 снежня з 00.00 да 24.00 на тэрыторыі Вілейскага раёна Менскай вобласці абмяжуюць продаж алкагольнай прадукцыі, за выключэннем рознічнага гандлю ў гандлёвых аб'ектах грамадскага харчавання ў разліў. Адпаведная пастанова прынятая Вілейскім раённым выканаўчым камітэтам на падставе пункта 5 артыкула 11 Закона Беларусі «Аб дзяржаўным рэгуляванні вытворчасці і абароту алкагольнай, нехарчовай спіртаўтрымліваючай прадукцыі і нехарчовага этылавага спірту».

Са слоў загадчыцы сектарам гандлю аддзела эканомікі райвыканкама Аксаны Сопрых, пастанова прынятая «ў сувязі з правядзеннем у гэтыя дні мерапрыемстваў у рамках Адзінага дня прафілактыкі, накіраваных на папулярызацыю здаровага ладу жыцця, прафілактыку п'янства і алкагалізму і барацьбу з імі».

Згодна з інфармацыяй Міністэрства аховы здароўя Беларусі, у 2014 годзе Адзіны дзень здароўя 20 лістапада пройдзе ў рамках Сусветнага дня адмовы ад палення і прафілактыкі анкалагічных захворванняў, а 18 снежня - у рамках Дня прафілактыкі траўматызму.