Расце колькасць хворых трыхінелёзам у Воранаўскім раёне
1- 9.11.2014, 14:44
- 16,035
У Воранаўскім раёне яшчэ тры чалавекі шпіталізаваныя з трыхінелёзам.
Пра гэта БелТА паведамілі ў Гарадзенскім абласным упраўленні МНС.
Як паведамлялася, 10 чалавек, з іх 1 дзіця 2004 нараджэння, былі шпіталізаваныя ў інфекцыйнае аддзяленне УАЗ «Воранаўская ЦРБ» з папярэднім дыягназам «трыхінелёз» у перыяд з 3 да 7 лістапада. На працягу суботы, 8 лістапада, дадаткова за дапамогай звярнуліся яшчэ 3 чалавекі.
«Пацярпелыя знаходзяцца пад наглядам лекараў, стан здавальняючы», - паведамілі ў абласным упраўленні МНС. Работнікі Воранаўскага цэнтра гігіены і эпідэміялогіі займаюцца высвятленнем абставінаў заражэння, а таксама ўсталяваннем поўнага круга асоб, якія маюць прыкметы інфекцыйнага захворвання.
Канчатковы дыягназ будзе выстаўлены захварэлым 14 лістапада пасля таго, як будуць атрыманыя вынікі лабараторных даследаванняў.
Трыхінелёз - паразітарнае захворванне, узбуджальнікам яго з'яўляюцца Trichinella. Заражэнне адбываецца пры ўжыванні інфікаванага трыхінеламі мяса. Асноўныя клінічныя праявы трыхінелёза - павышэнне тэмпературы, болі, у тым ліку ў цягліцах, ацёк твару, сып. Трыхінелёз можа выклікаць ускладненні, такія як міякардыт, сардэчная недастатковасць, пнеўманія, гепатыт, менінгаэнцэфаліт і іншыя. Імунітэт да трыхінел не выпрацоўваецца.