Кісінджэр: Перспектыва пачатку новай халоднай вайны цалкам рэальная

Захад выпусціў значэнне Украіны для Расеі.

Украіна заўсёды мела асаблівае значэнне для Расеі і недаацэнка гэтага факту была фатальнай памылкай, мяркуе былы дзяржсакратар ЗША Генры Кісінджэр.

«Еўропа і ЗША не зразумелі значэння падзей, якія пачаліся з перамоў аб эканамічных стасунках Украіны і Еўразвяза, а затым выліліся ў дэманстрацыі ў Кіеве. Стасункі Украіны з ЕЗ павінны былі стаць прадметам дыялогу з Расеяй», - заявіў Кісінджэр у інтэрв'ю нямецкаму штотыднёвіку Der Spiegel.

Ён адзначыў, што на фоне цяперашніх падзей ва Украіне перспектыва пачатку новай халоднай вайны цалкам рэальная. Калі не паставіцца да пагрозы сур'ёзна, «гэта можа прывесці да трагедыі», упэўнены былы кіраўнік замежнапалітычнага ведамства ЗША.

«Калі Захад хоча быць сумленным, то ён павінен прызнаць, што дапусціў памылку», - падкрэсліў Кісінджэр, кажучы аб украінскім крызісе.

Кісінджэр падкрэсліў, што чакае ад Нямеччыны больш рашучых дзеянняў на міжнароднай арэне.

«ФРГ - найважнейшая ў Еўропе краіна, Берлін павінен праяўляць больш ініцыятывы», - мяркуе палітык.

Лаўрэат Нобелеўскай прэміі міру Генры Кісінджэр займаў пасаду дзяржсакратара ЗША пры прэзідэнтах Рычардзе Ніксане і Джэральд Фордзе. Ён таксама з'яўляўся дарадцам у нацыянальнай бяспецы ЗША.

Кісінджэр уважаецца адной з самых яскравых фігур амерыканскай дыпламатыі 20 стагоддзя. Менавіта ён быў стваральнікам і ідэолагам палітыкі разрадкі міжнароднай напружанасці, якая была накіраваная на змякчэнне супрацьстаяння паміж краінамі сацыялістычнага і капіталістычнага блокаў.