Расія адмаўляецца ад «Паўднёвага патоку»
40- 1.12.2014, 21:25
- 40,649
Прэзідэнт РФ Уладзімір Пуцін заявіў аб адмове ад будаўніцтва "Паўднёвага патоку".
"Разам з тым, з улікам пазіцыі Еўракамісіі, якая не спрыяе рэалізацыі гэтага праекта, з улікам таго, што мы толькі што атрымалі, нядаўна зусім, дазвол ад адпаведных інстанцый у Нідэрландах... станоўча вырашылі. З улікам таго, што мы да гэтага часу не атрымалі дазволу Балгарыі, мы лічым, што Расея ў гэтых умовах не можа прадаўжаць рэалізацыю гэтага праекта", - сказаў Уладзімір Пуцін на прэс-канферэнцыі паводле вынікаў перамоў са сваім турэцкім калегам Рэджэпам Таіпам Эрдаганам, паведамляе РІА "Новости".
"Мы не можам пачаць будаўніцтва ў моры да таго часу, пакуль у нас няма дазволу ад Балгарыі пачаць будоўлю ў моры, падысці да балгарскага берагу і спыніцца - гэта проста недарэчна", - дадаў ён.
Кіраўнік расейскай дзяржавы дадаў, што, "у канчатковым выніку, гэта выбар Балгарыі", піша Цензор.НЕТ.
Пуцін таксама заявіў, што з прычыны пазіцыі Еўракамісіі аб "Паўднёвым патоку" Масква перанакіруе напрамак паставак сваіх энергарэсурсаў.
"Мы лічым, што пазіцыя Еўракамісіі была неканструктыўнай. Па сутнасці, не тое каб Еўракамісія дапамагала ў рэалізацыі гэтага праекта, мы бачым, што ствараюцца перашкоды ў ягонай рэалізацыі. Ну, калі Еўропа не хоча яго рэалізоўваць, ну, значыць, тады ён не будзе рэалізаваны ", - сказаў ён.
Прэзідэнт РФ адзначыў: "Мы перанакіруем патокі нашых энергарэсурсаў на іншыя рэгіёны свету, у тым ліку з дапамогай прасоўвання і паскоранай рэалізацыі праектаў аб звадкаваным прыродным газе".
"Паўднёвы паток" разглядалі ў якасці канкурэнта і альтэрнатывы праекту "Набука", таксама прызначанага для забеспячэння газам краін Паўднёвай і Цэнтральнай Еўропы.