«Рэпарцёры без межаў» патрабуюць вызваліць Аляксандра Алесіна
1- 10.12.2014, 10:46
- 3,215
Міжнародная праваабарончая арганізацыя звярнулася да беларускіх уладаў.
У заяве «Рэпарцёраў без межаў», атрыманай рэдакцыяй charter97.org, утрымліваецца патрабаванне неадкладна вызваліць вайсковага аглядальніка выдання «Беларусы і рынак» Аляксандра Алесіна, затрыманага КДБ Беларусі 25 лістапада і абвінавачанага ў «шпіянажы».
Арганізацыя нагадвае, што журналісту пагражае пакаранне ў выглядзе 15 гадоў пазбаўлення волі.
«Рэпарцёры без межаў» настойваюць на неадкладным вызваленні Аляксандра Алесіна і павазе ягоных правоў на належную прававую працэдуру, - гаворыцца ў заяве. - Заклікаем улады не праводзіць расследаванне ягонай справы за зачыненымі дзвярыма, што часта адбываецца, калі журналісты абвінавачваюцца ў шпіянажы».
Нагадаем, вайсковы эксперт, аглядальнік штотыднёвіка «Беларусы і рынак» Аляксандр Алексін быў затрыманы спецслужбамі ў аўторак, 25 лістапада. Са слоў крыніцы charter97.org, яго арыштавалі ў падазрэнні ў шпіянажы ў кавярні ў цэнтры горада, дзе ён абедаў з невядомым мужчынам. У КДБ адмаўляліся каментаваць ягоны арышт.
Аляксандр Алесін - журналіст, эканамічны аглядальнік газеты «Беларусы і рынак». Спецыялізуецца ў сферы вайсковай аналітыкі. Пераможца Гран-пры прэміі «Залатое пяро» сярод журналістаў, што пішуць на аўтамабільную тэматыку ў дзелавых і рэспубліканскіх СМІ (2008).