Расея адпраўляе ў Данбас дзясяты «канвой»

Масква рыхтуе новы груз для сепаратыстаў ва ўсход Украіны.

Пра гэта заявіў на пасяджэнні Генеральнай Асамблеі ААН намеснік пастаяннага прадстаўніка Расеі пры ААН Дзмітрый Максімычаў, паведамляе ТАСС.

«Цяпер рыхтуецца дзясяты канвой. Украінскія ўлады былі належным чынам інфармаваныя пра яго змест і маршруты руху», - сказаў Максімычаў.

У сваю чаргу, першы сакратар пастпрэдства Украіны пры ААН Яраслаў Галіцын, выступаючы з трыбуны ГА, нагадаў прысутным, што расейскія гуманітарныя канвоі нелегальна перасякаюць мяжу без папярэдняй згоды, іх не дазваляюць інспектаваць і не каардынуюць з Чырвоным Крыжам.

«Што перавозілі гэтыя канвоі - дакладна невядома. Гэтак жа як і эфект, які яны аказалі на гуманітарную сітуацыю ў Данбасе», - сказаў дыпламат.

Галіцын адзначыў, што ўкраінскія ўлады накіравалі ў Данбас сотні тон гуманітарнай дапамогі, а таксама працягваюць пастаўляць газ і электраэнэргію ў кантраляваныя тэрарыстамі раёны, нягледзячы на значныя запазычанасці па плацяжах. Ён таксама заявіў, што поўную адказнасць за вымушанае спыненне Украінай выплаты сацыяльных дапамог на Данбасе нясуць незаконныя ўзброеныя групы, якія захопліваюць і раскрадаюць усе фінансавыя сродкі, выдзеленыя ўкраінскім урадам на гэтыя мэты. «Усе сацыяльныя грашовыя дапаможнікі будуць знаходзіцца на захоўванні ў банку і будуць неадкладна выплачаныя кожнаму, як толькі мы адновім кантроль над гэтымі раёнамі», - сказаў украінскі дыпламат.

Нагадаем, учора дзявяты «канвой» Расеі вярнуўся з Данбаса.

Фота з архіву