Украіна адмовілася купляць беларускі агітпрап аб 2-й сусветнай вайне

Украіна адмовілася закупляць беларускую кінематаграфічную прадукцыю.

Украіна адмовілася закупляць беларускую кінематаграфічную прадукцыю, у першую чаргу прысвечаную тэматыцы другой сусветнай вайны, канстатаваў сёння дырэктар Беларусьфільма Алег Сільвановіч, піша АФН са спасылкай на БелТА.

«У сувязі з крызісам ва Украіне шэраг беларускіх фільмаў цалкам перасталі закупляць. Фільмы, якія тычацца Вялікай Айчыннай вайны, проста сышлі з сеткі трансляцыі. Фільмы, якія кажуць пра нейкае супрацоўніцтва паміж нашымі дзяржавамі, таксама не закупляюцца», - прызнаў Сільвановіч.

Ён таксама пацвердзіў наяўнасць агітпрапаўскага складніка ў прадукцыі кінастудыі.

«Экспарт фільмаў мае адначасова і эканамічны, і ідэалагічны, і палітычны складнікі, таму не ў кожнай дзяржаве можна прадаць тую ці іншую карціну. Мы не можам адзін і той жа фільм прадаць у розныя дзяржавы. У іх ёсць сваё веравызнанне, свой погляд на гісторыю і цэнзура. Некаторыя беларускія фільмы проста не праходзяць гэтую цэнзуру», - сказаў Сільвановіч.