Журналіста Алеся Залеўскага выклікаюць у пракуратуру

Супрацоўнікам польскага тэлеканала TVP зацікавілася менская гарадская пракуратура.

Допыт прызначаны на сёння. Ён пройдзе а 13:00, паведамляе тэлеканал «Белсат».

Са слоў Алеся Залеўскага, на гэты раз міліцыянты ў якасці сведкі выклікалі аператара Сяргея Краўчука, якога распытвалі аб працы журналіста.

Супрацоўнік польскага тэлеканала TVP дапускае, што яго могуць абвінаваціць у парушэнні артыкула 22.9 КоАП (незаконны выраб і распаўсюд інфармацыі) за працу на працэсе ў справе праваабаронцы Алены Танкачовай.

Гэта ўжо трэцяе адміністрацыйная справа, заведзеная на Алеся Залеўскага за апошні год. Па тым жа артыкуле Карэліцкі раённы суд 27 траўня аштрафаваў журналіста на 30 базавых велічынь. Фактычна, гэта было пакаранне за рэпартаж аб прыватным краязнаўчым музеі ў Міры, які мае больш аўтэнтычных экспанатаў, чым дзяржаўны.

Сёлета Алесь Залеўскі, які супрацоўнічае з «Белсатам», атрымаў узнагароду за лепшае выданне публіцыстычнай праграмы ў 2014 годзе - «Людскія справы: Карупцыя ў ЖКГ». Менавіта праз гэту праграму, у якой вядучы раскрывае адну з схем крадзяжоў у камунальных службах, аўтара пакаралі штрафам у 6 мільёнаў рублёў, абвінаваціўшы ў «нелегальным вырабе і распаўсюдзе прадукцыі СМІ».