«Палатачнікі» вызначылі, як правільна слухаць лукашэнкаўскі гімн

Пад гукі гімна цяпер трэба будзе глядзець на сцяг, інакш - штраф.

Вядома, шукаць бліжэйшы ў полі зроку дзяржсцяга не трэба. Але вось калі падчас урачыстай цырымоніі загучаў гімн і сцяг лунае непадалёк, да яго трэба павярнуцца тварам. Такую норму прапісалі ў законе пра дзяржаўныя сімвалы Рэспублікі Беларусь, за які ўчора ў першым чытанні прагаласавалі «дэпутаты» беларускага «парламента», піша «Комсомольская правда в Беларуси».

Ёсць і яшчэ адна навіна: школьнікі як мінімум двойчы за навучальны год будуць слухаць гімн - на першай лінейцы года і апошняй.

- Дзяржаўны сцяг будзе размяшчацца на будынках установы агульнай сярэдняй адукацыі ў дні пачатку і заканчэння навучальнага года, - распавёў «дэпутатам» міністр юстыцыі Алег Сліжэўскі. - У мэтах патрыятычнага выхавання непаўналетніх, выпадкі выканання дзяржаўнага гімна РБ дапаўняюцца становішчам аб яго выкананні ў дні пачатку і заканчэння навучальнага года ва ўстановах агульнай сярэдняй адукацыі.

- Цяпер трэба будзе глядзець на сцяг падчас выканання гімна? І так будзе ўсюды? Не толькі на школьных лінейках? - Удакладнілі журналісты.

- Пры адначасовым выкарыстанні гімна і сцяга - так. Гэта агульны падыход.

- Ці будзе прымяняцца нейкая адказнасць у тым выпадку, калі беларус не павернецца ў патрэбны бок?

- Ёсць адміністрацыйная адказнасць за непаважлівае стаўленне і за здзекі над дзяржсімваламі.

- Тое ж самае, калі не ўстаеш падчас выканання гімна?

- Так, гэта таксама непаважлівае стаўленне. За парушэнне заканадаўства, што датычыцца дзяржсімвалаў, - штраф да 5 базавых велічынь.

Нагадаем, пасля рэферэндуму, праведзенага з парушэннем Канстытуцыі ў 1995 годзе, Лукашэнка забараніў гістарычныя сімвалы беларусаў - герб «Пагоня» і бел-чырвона-белы сцяг і вярнуў перайначаныя сімвалы БССР.