Джэймс Уотсан прадаў свой Нобелеўскі медаль з аўкцыёну
7- 6.12.2014, 14:28
- 9,464
Амерыканскі вучоны прадаў на аўкцыёне залаты медаль, які быў яму ўручаны разам з Нобелеўскай прэміяй за адкрыццё структуры ДНК.
У выніку таргоў медаль пайшоў з малатка за 4,8 млн даляраў. Узнагарода Джэймса Уотсана стала першым медалём у гісторыі прэміі, прададзеным самім лаўрэатам яшчэ пры жыцці, паведамляе BBC.
Вучоны заявіў, што наважыў прадаць узнагароду праз тое, што быў падвергнуты астракізму ў навуковай супольнасці пасля заўвагі з нагоды адносін да розных расаў, выказанай ім у 2007 годзе ў адным з інтэрв'ю.
Нобелеўскую прэмію за адкрыццё структуры ДНК у 1962 годзе Уотсан падзяліў з Морысам Уілкінсам і Фрэнсісам Крыкам.
Трохмерная малекулярная структура ДНК, якая з'яўляецца асноўнай інструкцыяй для будаўніцтва жывога арганізма і вызначае агульныя і індывідуальныя асаблівасці жывой матэрыі, была адкрыта Уотсанам і Крыкам на аснове эксперыментальнай базы звестак, складзенай Морысам Уілкінсам, Рэймандам Гослінгам і Разалінд Франклін.
86-гадовы Уотсан заявіў, што мае намер аддаць частку выручаных ад продажу медаля грошай на дабрачыннасць і падтрымку навуковых даследаванняў.
Аўкцыённы дом Christie's перад таргамі ацэньваў медаль у 2,5 - 3,5 млн даляраў.
У нядаўнім інтэрв'ю газеце Financial Times Уотсан распавёў, што адчуваў сябе «недачалавекам» пасля злапомнага інтэрв'ю ў Sunday Times, у якім ён увязаў узровень інтэлекту з расавым паходжаннем.
Калега Уотсана Фрэнсіс Крык памёр у 2004 годзе, яго нобелеўскі медаль быў прададзены ў мінулым годзе за 2,2 млн даляраў.