Пуцін абмеркаваў закрыццё «Паўднёвага патоку» з лідарамі Вугоршчыны і Сербіі

Прэзідэнт Расеі правёў тэлефонныя перамовы з прэм'ер-міністрам Вугоршчыны Віктарам Орбанам і прэзідэнтам Сербіі Таміславам Нікалічам.

Пра гэта паведамілі ў прэс-службе Крамля, піша Lenta.ru.

Асноўнай тэмай размовы стала ўзаемадзеянне паміж краінамі «ў энэргетычнай сферы ў святле спынення рэалізацыі праекта «Паўднёвы паток». Акрамя таго, абмяркоўваліся і іншыя «актуальныя пытанні двухбаковага супрацоўніцтва».

Будаўніцтва газаправода «Паўднёвы паток» было прыпынена 1 снежня пасля візіту Уладзіміра Пуціна ў Анкару. Са слоў расейскага прэзідэнта, рэалізацыя праекта не можа працягвацца ў сапраўдных умовах. Пуцін удакладніў, што Расея мае намер пабудаваць новыя трубаправодныя сістэмы, накіраваныя на іншыя рынкі, у тым ліку ў Турцыю.

Закрыццё праекта выклікала незадаволенасць у Будапешце і Бялградзе. Прынамсі, вугорскі прэм'ер абвінаваціў Еўразвяз у байкоце «Паўднёвага патоку». А прэзідэнт Сербіі заяўляў, што мае намер ініцыяваць прамы кантакт з Уладзімірам Пуціным аб далейшым супрацоўніцтве паміж краінамі ў энэргетычнай сферы.

Праект «Паўднёвы паток» коштам 15,5 мільярда еўра быў разлічаны на пастаўку ў Еўропу 67 мільярдаў кубаметраў газу ў год. Ён павінен быў прайсці праз акваторыю Чорнага мора ў краіны Паўднёвай і Цэнтральнай Еўропы. Меркавалася, што транспарціроўка газу па ім пачнецца ў канцы 2015 года. Газаправод планавалася пракласці па тэрыторыі Балгарыі, Сербіі, Вугоршчыны, Аўстрыі, Італіі і Славеніі. Пра жаданне ўдзельнічаць у праекце таксама заяўляла Македонія.