Украіна плануе падатковую амністыю
15- 9.12.2014, 19:25
- 12,699
Падатак для малога і сярэдняга бізнесу ва Украіне скароцяць удвая.
Пра гэта паведаміў падчас пасяджэння ўрада краіны прэм'ер-міністр Арсень Яцанюк, - піша УНІАН.
Кабінет міністраў Украіны мае намер у 2 разы скараціць стаўку адзінага падатку і ўвесці двухгадовы мараторый на праверку малога і сярэдняга бізнесу. "Аб малым і сярэднім бізнесе мы прапануем два простых рашэнні. Першае рашэнне - скараціць у два разы для малога і сярэдняга бізнесу адзіны падатак, і другое рашэнне - проста два гады іх не чапаць і не правяраць", - сказаў прэм'ер.
Таксама ён адзначыў, што прадугледжаная планам дзеянняў урада да 2016 года рэформа трансфертнага цэнаўтварэння дасць магчымасць пераразмеркаваць падатковую нагрузку ў напрамку яе скарачэння для малога і сярэдняга бізнесу.
Кабінет міністраў Украіны таксама мае намер у бліжэйшы час унесці ў парламент законапраекты аб падатковым кампрамісе, увядзенні ўсеагульнага дэкларавання даходаў, а таксама ўдасканаленні сістэмы кантролю за трансфертным цэнаўтварэннем буйных кампаній.
Паводле слоў Яцанюка, падатковы кампраміс і ўсеагульнае дэклараванне ўстанаўліваюць нулявую «стаўку» падаткаабкладання наяўных актываў, але мяркуюць далейшы кантроль даходаў і выдаткаў.
У сваю чаргу, у рамках кантролю за трансфертным цэнаўтварэннем буйных кампаній, са слоў Яцанюка, Кабмін сваімі пастановамі мае намер выключыць любую магчымасць вываду капіталаў праз афшоры.