«Кіроўцу-каральніка» звольнілі з аўтапарка (Відэа)

Кіроўца аўтобуса, які атрымаў мянушку «каральнік» дзякуючы відэа з 20 эпізодамі аварый у сталіцы, адхілены ад працы.

Як паведамілі ў аўтобусным парку, учора рашэнне ДАІ ўступіла ў сілу. Інспектары пазбавілі правоў 43-гадовага мужчыну на два гады ў якасці пакарання за адміністрацыйнае парушэнне - было ўстаноўлена, што па яго віне здарылася ДТЗ.

Відавочцы паведамляюць, што бачылі кіроўцу на ДС «Малініна». Каля 15:00, па словах аднаго з менчукоў, ён знаходзіўся за рулём аўтобуса-«гармоніка». У аўтапарку запэўніваюць, што гэта немагчыма, піша onliner.by.

«Кіроўца застаўся цяпер ужо і без часовага пасведчання, ад перавозкі людзей ён адхілены, - расказаў намеснік дырэктара аўтапарка №6 Аляксандр Лужынскі. - Падставай для гэтага паслужылі як рашэнне Дзяржаўтаінспекцыі, так і ўнутраныя дакументы. Акрамя таго, нейкі час ён павінен будзе праходзіць пазапланавы медыцынскі пераагляд».

Па словах Аляксандра Лужынскага, кіроўца апынуўся не згодны з рашэннем ДАІ. «У яго было права на працягу 10 дзён апратэставаць пратакол, - удакладніў намеснік дырэктара філіяла. - І ён ім скарыстаўся, звярнуўся ў суд».

Нагадаем, па рашэнні ДАІ, кіроўца парушыў пункт 85 ПДР («Кіроўца абавязаны выконваць такую дыстанцыю да аўтамабіля, які рухаецца наперадзе, якая дазволіла б пазбегнуць сутыкнення ў выпадку яго экстранага тармажэння або спынення, і неабходны бакавы інтэрвал, які забяспечвае бяспеку руху з аўтамабілямі, якія стаяць або рухаюцца па суседніх палосах руху») і здзейсніў ДТЗ 3 снежня на вуліцы Несцерава. У дачыненні да кіроўцы аўтобуса ўжылі максімальнае пакаранне па паказаным артыкуле - пазбаўленне правоў на 2 гады.

Сам кіроўца прадставіў сітуацыю таго вечара па-іншаму (арфаграфія і пунктуацыя захаваныя): «БМВ нахабна аб'ехаў калону па сустрэчнай паласе і спыніўся каля аўтобуса. Аўтобус стаяў перад самім святлафорам першым. Загарэўся зялёны і я пачаў рух з паскарэннем кантралюючы ў левае люстэрка гэтую машыну, каб пазбегнуць бакавога сутыкнення. Праз некалькі секунд, гэта ж БМВ абагнаўшы аўтобус наўмысна ўжо тармазіў перастройваючыся з сустрэчнай паласы ў спадарожную паласу руху на адлегласці метраў дзесяці, і відаць вырашыўшы правучыць кіроўцу аўтобуса знізіў хуткасць да мінімуму, адпусціў тармазы і спыніў рух ствараючы аварыйную абстаноўку. Адпусціўшы педаль газу, я пачаў плыўнае тармажэнне ў надзеі ўзнаўлення кіроўцам БМВ далейшага руху ў прамым кірунку. Калі я зразумеў, што гэтага не адбудзецца, націснуў на педаль тормазу мацней. Так як у гадзіну пік грамадскі транспарт загружаны, то ў мяне салон быў поўны, гэта больш за дзвесце чалавек, а гэта поўная вага аўтобуса больш за трыццаць тон, і спыніцца хутка немагчыма. У пазбяганне падзення і траўмаў пасажыраў, мы не можам прымяняць экстранага тармажэння. Падстава ўзнагароджваецца, у чым пераканаўся кіроўца БМВ атрымліваючы страхоўку, пра што будзе распавядаць сябрам і вучыць як гэта рабіць».

Гэта ДТЗ - тыповая для кіроўцы аўтобуса. За мінулы год здарылася як мінімум 20 падобных інцыдэнтаў. Усе яны трапілі ў відэападборку, складзеную самім шафёрам. Як запэўнівае мужчына, ён не звяртаецца да экстранага тармажэння, каб не ўпалі пасажыры, якія знаходзяцца ў салоне.