Лаўроў і Кэры не дамовіліся
42- 14.03.2014, 19:36
- 56,137
Кіраўнік МЗС РФ і дзяржсакратар ЗША не дасягнулі дамоўленасці ва ўрэгуляванні сітуацыі ва Украіне.
Пра гэта Сяргей Лаўроў паведаміў на прэс-канферэнцыі ў Лондане аб выніках сустрэчы.
«Што да практычных захадаў, якія маглі б ужыць замежныя краіны, то ў нас няма агульнага бачання сітуацыі, разыходжанні захоўваюцца, але размова была, безумоўна, карыснай», - заявіў кіраўнік МЗС РФ.
Расейскі міністр уважае за непатрэбны працяг абмеркавання да правядзення рэферэндуму ў Крыме 16 сакавіка.
Прапановы Захаду аб кантактнай групе ва Украіне ў цяперашнім выглядзе Лаўроў назваў непрымальнымі.
«Кантактная група ў тым выглядзе, у якім яна цяпер прапануецца нашымі заходнімі партнёрамі, зыходзіць з таго, што мэтай гэтага шматбаковага працэсу павінна быць прыянне наўпроставаму дыялогу паміж Украінай і РФ. Нам здаецца, што гэта адкрытая падмена паняццяў, таму што крызіс паўстаў не з віны РФ», - заявіў ён.
Кіраўнік расейскага МЗС падкрэсліў, што Расеі «не патрэбная ніякая міжнародная структура для таго, каб разглядаць расейска-ўкраінскія стасункі».
Кіраўнік дыпламатычнай установы РФ адзначыў, што Крым з'яўляецца вельмі важным для Расеі.
«Ці ёсць прэцэдэнты ў міжнародным праве, ці няма прэцэдэнтаў - а яны ёсць - усё разумеюць, і гэта я адказна заяўляю, што значыць Крым для Расеі, а ён значыць невымерна больш, чым Каморы для Францыі ці Фолклэнды для Вялікабрытаніі», - сказаў ён.
Лаўроў папрасіў заходніх партнёраў не разглядаць выпадак з Крымам «ізалявана ад гісторыі».
«Перакананы: калі Косава - асаблівы выпадак, то Крым - не менш асаблівы выпадак», - падкрэсліў ён.
Нагадаем, у бліжэйшую нядзелю ў Крыме адбудзецца «рэферэндум» аб аддзяленні АРК ад Украіны. МЗС РФ ужо заявіла, што пасля «рэферэндуму» Крым можа звярнуцца да Расеі з просьбай уключыць яго ў склад РФ.
Правядзенне рэферэндуму ў Крыме асуджаюць і не маюць намеру прызнаваць краіны Еўразвязу, ЗША і Канада. У АБСЕ заявілі, што не збіраюцца прымаць запрашэнне крымскіх сепаратыстаў узяць удзел у рэферэндуме ў якасці назіральнікаў.
Фота: AFP