ЗША перададуць сірыйскім паўстанцам зенітныя комплексы

Рашэнне прынята перад пачаткам візіту Абамы ў Саудаўскую Аравію.

Па дадзеных The Washington Post (пераклад - Inopressa.ru), якая спасылаецца на інфармаваныя крыніцы, адміністрацыя прэзідэнта ЗША плануе навучаць да 600 сірыйскіх апазіцыянераў кожны месяц (цяпер - удвая менш). Трэніроўкі будуць праходзіць у лагерах на тэрыторыі Іарданіі, Саудаўскай Аравіі і Катара. Адказваць за падрыхтоўку апазіцыянераў, хутчэй за ўсё, будзе ЦРУ, хоць сірыйскі бок просіць перадаць кантроль сілам Камандавання спецаперацый, матывуючы гэта тым, што ў іх няма "палітычнага багажу".

Мяркуецца, што навучанне змогуць праходзіць усе жадаючыя, акрамя байцоў экстрэмісцкіх груповак "Ахрар аш-Шам", "Фронт ан-Нусра" і "Ісламская дзяржава Ірака і Ляванта" (праверка навабранцаў будзе праходзіць да, падчас, і пасля трэніровак, "падазроных" рэкруцёры будуць адсяваць). Зрэшты, не выключаная магчымасць таго, што ЗША ўскосна дапаможа такім чынам тэрарыстам "Аль-Каіды".

Пашыраная праграма "адправіць выразны сігнал рэжыму Асада, што не існуе ваеннага вырашэння праблемы", лічыць апазіцыя, адзначаючы, што ў Асада "няма стымулу весці перамовы", пакуль ён думае, што выйграе супрацьстаянне.

Такім чынам, рашэнне павялічыць садзейнічанне сірыйскай апазіцыі прынята таму, што сітуацыя ў Сірыі зайшла ў тупік.

Амерыканская праграма ў цэлым накіраваная на стабілізацыю сітуацыі ў Сірыі. Яна, напрыклад, прадугледжвае дапамогу мясцовым саветам і сілам паліцыі ў раёнах, вызваленых ад войскаў Асада, і ўстанаўленне калідораў падвозу гуманітарнай дапамогі.

Але акрамя гэтага, мяркуецца і магчымасць забяспечыць сірыйскіх паўстанцаў пераноснымі зенітна-ракетнымі комплексамі (ЗРК) тыпу MANPAD (Man Portable Air Defense System). Пры гэтым апазіцыя прапанавала ўвесці за ЗРК строгі кантроль. Першапачаткова будзе пастаўлена ўсяго пяць комплексаў, прычым кожны раз іх выкарыстанне будзе фіксавацца на відэа. Кожны пераносны ЗРК будзе абсталяваны сігналізатарам месцазнаходжання і механізмам дыстанцыйнага выключэння.