Віктар Небажэнка: Дзеянні «Правага сектара» на фоне расейскай агрэсіі не прыгожаць яго

Сінхранізацыя росту колькасці расейскіх войскаў і спробы штурму Вярхоўнай Рады бянтэжыць.

Можа, гэта выпадковасць, але ў Кіеве гэтыя рэчы вельмі моцна перажываюць. І «Праваму сектару» трэба растлумачыць, што ў іх ёсць заслугі перад Майданам, але іх дзеянні на фоне рускай агрэсіі іх не прыгожаць. Пра гэта заявіў палітолаг Віктар Небажэнка, піша Цензор.нет.

Паводле яго слоў, любая новая ўлада сутыкаецца з двума відамі пагроз - са знешнімі і ўнутранымі.

«Гэтак жа, як у Расеі кансерватары-радыкалы кажуць, што Пуцін недастаткова жорстка дзейнічае ў дачыненні да Украіны, так і ў нас ёсць сілы, якія заклікаюць Украіну дзейнічаць больш радыкальна. І ўсе ў выніку крытыкуюць уладу. У нас ёсць правыя радыкалы, якія лічаць, што ўлада нібыта не дастаткова дзейнічае, таму і бярэ штурмам парламент. Але ўлада лічыць, што гэта не метад, калі ўчорашнія саюзнікі ўжо расхістваюць усё і крытыкуюць за ліберальнасць», - кажа ён.

Палітолаг лічыць, што стварэнне следчай камісіі па гібелі Аляксандра Музычко - вельмі правільнае рашэнне ўлады.

«Яна павінна навучыцца вырашаць канфлікты мірным шляхам і публічна. Інакш гэта ні да чаго не прывядзе, будуць лічыць, што ўлада нешта хавае. Таксама лічу правільнай прапанову ўключыць у гэтую камісію і прадстаўнікоў грамадскасці, «Правага сектара», або «левага» - гэта значыць усе, хто лічыць, што перажывае за краіну. Трэба расследаваць, трэба разбірацца. Зараз я лічу, што новай уладзе, ураду трэба больш публічнасці. Будзе публічнасць - будзе ўсё ў парадку. Напрыклад, Уладзімір Пуцін ненавідзіць Украіну і глядзіце, як вырас рэйтынг, а маўчаў бы, усе думалі б, што другі Мядзведзеў, і рэйтынгі б падалі. Таму публічнасць - вялікая справа. Палітык павінен умець не толькі прэтэндаваць на ўладу, але і тлумачыць свае паводзіны», - кажа Небажэнка.