Мілінкевіч зноў заклікаў ЕЗ да дыялогу з рэжымам Лукашэнкі
38- 1.04.2014, 13:35
- 22,108
Старшыня руху «За Свабоду» раптам убачыў чарговае «акно магчымасцяў».
Сёння можа адкрыцца новае акно магчымасцяў для паляпшэння адносінаў паміж Еўразвязам і Беларуссю, як было ў 2008 годзе.
Пра гэта заявіў старшыня руху «За Свабоду» Аляксандр Мілінкевіч 1 красавіка ў ходзе абмеркавання сітуацыі ў Беларусі на пасяджэннях Еўрапарламента і Парламенцкай асамблеі Еўранэст.
«Варта працягваць дзейнасць згодна з парадкам дня, які вызначылі на Віленскім саміце «Усходняга партнёрства»: візавае пытанне, ахова мяжы, абмеркаванне мадэрнізацыі і г.д.
Упершыню за многія гады сфармаваўся такі канструктыўны парадак дня. Нельга дапусціць, каб з-за ўкраінскіх падзей яго разбурылі», - лічыць Аляксандр Мілінкевіч.
Выступаючы на пасяджэнні Камітэта па знешняй палітыцы Еўрапарламента, Аляксандр Мілінкевіч адзначыў, што Беларусь заняла добрасуседскую пазіцыю датычна Украіны. У прыватнасці, прызнаная новая ўлада і робіцца спроба прапанаваць пасярэдніцтва паміж Кіевам і Масквой, паведамляе прэс-служба руху «За свабоду».
«Гэта з'яўляецца праявай правядзення незалежнай палітыкі, таму не варта ізаляваць Беларусь разам з Расеяй з-за нашумелага галасавання ў Генеральнай асамблеі ААН па Украіне», - сказаў Мілінкевіч.
Разам з тым, з парадку дня перамоваў не павінна знікнуць праблема палітвязняў, лічыць старшыня руху «За Свабоду».
«ЕЗ неабходна прыкласці ўсе намаганні, каб пераканаць улады Беларусі ў тым, што выгады ад дыялогу і незалежнасць краіны сёння наўпрост залежаць ад вызвалення палітвязняў.
Для гэтага варта выкарыстоўваць магчымыя сродкі публічнай і сакрэтнай дыпламатыі. Вызваленне палітвязняў адкрые каналы эканамічнага супрацоўніцтва, інвестыцый, дапамогі ў мадэрнізацыі, неабходных для захавання эканамічнага і палітычнага суверэнітэту Беларусі», - сказаў на заканчэнне Аляксандр Мілінкевіч.
Нагадаем, старшыня руху «За Свабоду» не ўпершыню заклікае ЕЗ да супрацоўніцтва з беларускім рэжымам. У красавіку 2013 года Аляксандр Мілінкевіч нават заклікаў Еўразвяз адмовіцца ад санкцый супраць Лукашэнкі.