Музей Багдановіча стаў філіялам Музея гісторыі беларускай літаратуры
2- 1.04.2014, 15:09
- 6,734
Літаратурны музей Максіма Багдановіча ў Менску 1 красавіка афіцыйна перайшоў у разрад філіяла Дзяржаўнага музея гісторыі беларускай літаратуры.
Разам з ім у склад гэтага музея ўключаныя таксама сталічны Літаратурны музей Пятруся Броўкі.
Такая рэарганізацыя не паўплывае на працу музея Максіма Багдановіча, адзначыла ў інтэрв'ю БелаПАН цяпер ужо былы дырэктар музея Таццяна Шэляговіч. «Супрацоўнікі музея працягваюць сваю штодзённую працу, якая заключаецца ў даследаванні творчасці Максіма Багдановіча, папулярызацыі яго творчасці, рэалізацыі літаратурных, музейных, адукацыйных праектаў», - сказала яна.
У філіяле «Літаратурны музей Максіма Багдановіча», па яе словах, засталося працаваць пятнаццаць чалавек з сарака, гэта «роўна столькі, колькі неабходна для забеспячэння паўнавартаснай працы філіяла». Шэляговіч нагадала, што ў складзе самога музея Багдановіча былі два філіяла - «Фальварак «Ракуцеўшчына» і філіял «Беларуская хатка». У выніку рэарганізацыі музей і два яго падраздзялення сталі трыма паўнавартаснымі і раўнапраўнымі філіяламі Дзяржаўнага музея гісторыі беларускай літаратуры.
Тым не менш, лічыць яна, былым філіялам музея Багдановіча зараз патрэбная «чалавечая падтрымка», таму што «магчымасці філіяла «Літаратурны музей Максіма Багдановіча» на 100% пераўзыходзяць магчымасці філіяла «Беларускай хаткі» або «фальварку «Ракуцеўшчына». Хоць у апошнім, па словах Шэляговіч, цяпер няма ні кампутара, ні факса, там пячное ацяпленне на дровах.
Нагадаем, рэарганізацыя літаратурных музеяў Максіма Багдановіча і Петруся Броўкі была зацверджаная загадам Міністэрства культуры ад 4 студзеня 2014 года.