Так шмат пенсіянераў у Беларусі не было ўжо 70 гадоў

14% жыхароў краіны знаходзяцца ва ўзросце 65 гадоў і больш.

Паводле міжнародных крытэраў, насельніцтва лічыцца старым, калі доля асоб ва ўзросце 65 гадоў і старэй у ім складае 7%. У цяперашні час кожны 7-ы беларус знаходзіцца ва ўзросце 65 гадоў і старэй. Такога не было ніколі ў найноўшай гісторыі краіны, піша БелТА.

- Насельніцтва Беларусі старэе, - канстатаваў начальнік упраўлення дэмаграфічнай статыстыкі Нацыянальнага статыстычнага камітэта Руслан Урублеўскі. - У цяперашні час нагрузка на насельніцтва працаздольнага ўзросту пажылымі людзьмі дасягнула максімальнага значэння за ўсю пасляваенную гісторыю развіцця краіны. На пачатак 2014 года на 1000 чалавек у працаздольным узросце прыходзілася 403 чалавекі старэйшыя за працаздольны, у 2009 годзе - 355 чалавек.

На пачатак бягучага года колькасць гэтай групы працаздольнага насельніцтва склала 5,6 млн чалавек (59,4% ад агульнай колькасці насельніцтва) і за год паменшылася на 64,3 тыс. чалавек. Прагназуецца, што тэндэнцыя змяншэння колькасці працаздольнага насельніцтва захаваецца, паколькі ў дадзены ўзрост будуць уступаць малалікія групы насельніцтва нараджэння пачатку 90-х гадоў, якія характарызуюцца нізкім узроўнем нараджальнасці. Разам з тым з гэтай узроставай катэгорыі паступова выходзяць пакаленні народжаных у пасляваенныя гады, для якіх быў характэрны рост нараджальнасці.

Колькасць насельніцтва маладзей працаздольнага ўзросту (да 15 гадоў) склала 1,6 млн чалавек (16,7% ад агульнай колькасці насельніцтва) і за год павялічылася на 31,4 тыс. чалавек. Такое павелічэнне звязана з уступленнем у дзетародны ўзрост жанчын 80-х гадоў нараджэння, калі быў дастаткова высокі ўзровень нараджальнасці.

Колькасць насельніцтва старэйшых за працаздольны ўзрост склала 2,3 млн чалавек і за 2013 год павялічылася амаль на 37,1 тыс. Доля людзей гэтай узроставай катэгорыі мае ўстойлівую тэндэнцыю да павелічэння ўжо на працягу многіх гадоў.

Дарэчы, сёння кіраўнік расейскага Мінфіна заявіў аб тым, што пенсійная сістэма краіны мае патрэбу ў далейшым рэфармаванні і павінна прывесці да павышэння пенсійнага ўзросту. Часцей за ўсё гаворыцца пра 60 гадоў для жанчын і 65 - для мужчын. Супраць гэтага традыцыйна выступаюць кіруючыя палітыкі (непапулярнае рашэнне сярод выбаршчыкаў) і прадстаўнікі ведамстваў працы і сацыяльнай абароны.