Лукашэнка: Я ўжо падазраю ўсё кіраўніцтва Менгарвыканкама

Кіраўнік раскрытыкаваў менскія ўлады за валакіту і няўменне працаваць з інвестарамі.

Сваю незадаволенасць ён выказаў сёння на нарадзе па пытанні выканання даручэнняў аб будаўніцтве значных аб'ектаў у Менску, перадае БелТА. "Мне ўжо надакучыла, шчыра кажучы, пастаянна сутыкацца з адтэрміноўкамі, зрывамі запланаванага, пераглядамі інвестыцыйных праектаў па будаўніцтве значных аб'ектаў", - сказаў кіраўнік.

Лукашэнка са шкадаваннем заўважыў, што найбольш часта такія сітуацыі ўзнікаюць у Менску, што не робіць гонару гарадскім уладам. "Гэтая тэма - будаўніцтва ў Менску - дайшла да крайняй кропкі. Скажу прама: я больш трываць гэтага не маю намеру, калі гэта задавальняе ўрад і нават праваахоўныя органы, то мяне гэта вельмі не задавальняе", - падкрэсліў Лукашэнка.

"Выбачайце, але я ўжо пачынаю падазраваць усё кіраўніцтва Менгарвыканкама, і для гэтага ў мяне ёсць падставы. Я ўжо не адзін раз гаварыў пра першага намесніка мэра Менска, які трапіўся на велічэзных хабарах, я так разумею, ён ужо асуджаны. Гэта проста так не бывае. І тое, што сёння адбываецца ў Менску, і тыя даклады, якія я атрымліваю, мяне проста насцярожвае. Не атрымалі б мы яшчэ большы які-небудзь варыянт, чым з вашым першым намеснікам, - сказаў кіраўнік, звяртаючыся да Мікалая Ладуцькі. - То вам не падабаецца, гэта не падабаецца, то вы інвестара шукаеце цэлы год, то вы дапрацоўваеце канцэпцыю, калі ёсць гатовая і людзі гатовыя нешта рабіць, то вы пераносіце тэрміны самавольна, аж за 20-ы год. Так там ужо нікога з нас не застанецца, хто там будзе будаваць, хто вашыя задумы будзе рэалізоўваць?"

Лукашэнка адзначыў, што сталіца - гэта твар краіны і невыпадкова асаблівая ўвага надаецца стварэнню тут новых значных аб'ектаў, фармаванню спрыяльнай для пражывання людзей сучаснай інфраструктуры, рэканструкцыі гістарычных і культурных помнікаў. "Усё гэта робіцца на карысць людзей, у інтарэсах як цяперашняга, так і будучых пакаленняў, - сказаў Лукашэнка. - Аднак мяне турбуюць нізкія тэмпы і асабліва якасць работ. І віна тут не толькі праекціроўшчыкаў і будаўнікоў, але і тых службовых асоб, якія арганізуюць працэс і павінны несці поўную адказнасць за ход рэалізацыі праектаў".

Па словах кіраўніка, асабліва негатыўная сітуацыя на працягу многіх гадоў складаецца з такімі аб'ектамі, як "Менск-Сіці", стадыёны "Трактар" і "Дынама", Цэнтр фрыстайлу, аквапарк. "На кожным з іх цэлая куча праблем, якія доўгі час не вырашаліся. Сваю ролю ў гэтым згулялі і валакіта, і няўменне працаваць з інвестарамі, і адсутнасць кантролю, адкрытая бяздзейнасць у складаных сітуацыях", - лічыць Лукашэнка.

"З гэтага пункту гледжання працу Менскага гарвыканкама інакш як нездавальняючай назваць нельга. Тут склаўся, мякка кажучы, своеасаблівы стыль працы і стаўлення да даручэнняў, у тым ліку прэзідэнта, - сказаў ён. - Калі прымаюцца рашэнні аб пачатку будаўніцтва - згодна ківаюць галовамі. Як толькі бяруцца за справу - пачынаюць раз за разам бегаць з просьбамі аб пераносе тэрмінаў, пераглядзе праектаў. Словам, замест працы - каніцель і валакіта! Такое стаўленне да справы проста недапушчальна!"

"Хацеў бы пачуць ад кіраўніка гарадской улады, па-першае, калі "Менск-Сіці" будаваць пачнем, па-другое, стадыён "Дынама"? Ці збіраецеся цягнуць з яго рэканструкцыяй да 2017 года? Па-трэцяе, дзе мы будзем праводзіць міжнародныя спаборніцтвы па футболе? Футбольная федэрацыя запэўнівала, што мы будзем прэтэндаваць на ўдзел у чэмпіянаце Еўропы-2020 года" - сказаў Лукашэнка. Акрамя таго, кіраўнік запатрабаваў далажыць, як ідзе сітуацыя з рэканструкцыяй стадыёна "Трактар": "Мяркуючы па тым, як развіваюцца падзеі, да яго рэканструкцыі, напэўна, будзем пасля 2020 года прыступаць. Так справа не пойдзе!"

Лукашэнка пацікавіўся таксама сітуацыяй па астатніх аб'ектах, якія ўжо будуюцца, планаваных мерах для паспяховай рэалізацыі праектаў і тым, што зроблена сумесна з урадам для іх бесперабойнага фінансавання. "Думаю, што на гэтыя праблемы звярнуў увагу Камітэт дзяржаўнага кантролю", - дадаў Лукашэнка.