Менскі жывадзёр расстрэльвае жывёл з пнеўматыкі
29- 11.04.2014, 11:19
- 11,668
У сталічныя ветлячэбніцы сталі трапляць каты і сабакі з раненнямі ад пнеўматычнай зброі.
Пра гэта паведамілі сайту charter97.org менскія зоаабаронцы.
5 сакавіка 2014 года на тэрыторыі Савецкага раёна горада Менска быў знойдзены паранены кот. Шляхам хірургічнага ўмяшання з цела жывёлы была вынятая куля, выпушчаная з пнеўматычнай вінтоўкі тыпу ІЖ. Яна прайшла пад хрыбетнікам, зачапіла пазваночны слуп, што выклікала параліч.
Па факце стральбы з пнеўматычнай зброі ў хатнюю жывёлу 10 красавіка ў раённае ўпраўленне ўнутраных спраў Савецкага раёна Менска была занесеная заява. Заяўнікі лічаць, што дзеянні неўстаноўленай асобы з'яўляюцца небяспечным для навакольных хуліганствам, у якім відавочна бачацца прыкметы правапарушэння, прадугледжанага артыкулам 15.45 «Жорсткае абыходжанне з жывёламі» Кодэкса аб адміністрацыйных правапарушэннях Рэспублікі Беларусь. Міліцыю просяць правесці праверку выкладзенага ў заяве факту, выявіць асобу правапарушальніка і прыцягнуць яго да адказнасці.
Па словах менскага ветэрынара Рыгора Чэгадаева, да яго ў клініку па меншай меры раз на два тыдні прыносяць параненую з пнеўматычнай зброі жывёлу.