Суд прызнаў незаконным блакаванне блога Навальнага

Люблінскі раённы суд Масквы разгледзеў скаргу Аляксея Навальнага на блакаванне яго блога ў інтэрнэце.

Пра гэта паведамляе прадстаўнік блогера прававы аналітык міжрэгіянальнай праваабарончай асацыяцыі "Агора" Дамір Гайнутдзінаў, піша РБК.

Суддзя адмовіў у задавальненні скаргі, але адначасова прызнаў апавяшчэнне Федэральнай службы па наглядзе ў сферы сувязі, інфармацыйных тэхналогій і масавых камунікацый (Раскамнагляд) незаконным і змяніў яго.

"Суддзя выйшаў за межы нашых патрабаванняў і прызнаў, што Раскамнагляд незаконна і няправільна аформіў апавяшчэнне, уключыўшы ў яго тое, у чым блог нават не падазраваўся", - паведаміў Гайнутдзінаў.

Паводле яго слоў, суддзя паказаў, што экстрэмізму і заклікаў да масавых беспарадкаў у блогу Навальнага няма, але нібыта ёсць заклікі да ўдзелу ў няўзгодненых з мясцовымі ўладамі публічных мерапрыемствах. "Менавіта таму суд вырашыў адмовіць нам у задавальненні нашай скаргі. Між тым, ніякіх доказаў ні Раскамнагляд, ні Генпракуратура так і не далі", - піша праваабаронца.

Прэс-сакратар Раскамнагляду Вадзім Ампялонскі адмовіўся ад каментароў па дадзеным рашэнні Люблінскага раённага суда. Пры гэтым Ампялонскі падкрэсліў, што апавяшчэнні аб блакаванні тых ці іншых рэсурсаў, якія Раскамнагляд рассылае аператарам сувязі, матываваныя Генпракуратурай. "Генпракуратура матывуе, аператар блакуе, мы ўносім у рэестр", - растлумачыў прадстаўнік Раскамнагляду.

Нагадаем, раней суд забараніў Навальнаму карыстацца інтэрнэтам, але абмежаванняў па распаўсюду інфармацыі трэцімі асобамі няма. На час арышту апазіцыянера блог вядзе яго жонка Юлія Навальная і супрацоўнікі Фонду барацьбы з карупцыяй.