Пуцін: Сітуацыя з нявыплатай доўгу Украінай недапушчальная
18- 11.04.2014, 17:02
- 17,352
Прэзідэнт Расеі патрабуе ад Кіева выплаты доўгу за газ.
Сітуацыя з нявыплатай Украінай доўгу за газ абсалютна недапушчальная. Такую заяву зрабіў Уладзімір Пуцін на пасяджэнні Савета бяспекі, перадае ІТАР-ТАСС.
"Піражкамі на Майдане не абыйдзешся, гэтага недастаткова, каб утрымаць украінскую эканоміку ад поўнага хаосу", - заявіў Пуцін.
Ён растлумачыў, што драматызм сітуацыі заключаецца ў тым, што ў першым квартале гэтага года дзейнічалі самыя нізкія кошты і па гэтых коштах украінскія партнёры перасталі плаціць.
"Гэта абсалютна недапушчальная сітуацыя", - падкрэсліў прэзідэнт.
Паводле яго слоў, у адпаведнасці з раней дасягнутымі дамоўленасцямі Газпрам зняў усе зніжкі.
"У чым заключаецца праблема на бліжэйшы час? Яна заключаецца ў тым, што Расея не можа несці ў аднабаковым парадку нагрузку", - сказаў Пуцін.
"Менавіта таму мы звярнуліся і да нашых еўрапейскіх партнёраў і сяброў, з тым, каб усім разам як мага хутчэй правесці сустрэчу і вызначыць шляхі дапамогі і падтрымкі ўкраінскай эканоміцы", - дадаў прэзідэнт Расеі.
Нагадаем, у пачатку красавіка кіраўнік Газпрама Аляксей Мілер заявіў, што кошт на газ для Украіны з бягучага месяца складае $485,5 за 1 тыс. куб. м.